Sultan Sarsemalıev sońǵy sózinde 25 jylǵa sottaýdy surady
ATYRAÝ. KAZINFORM – Atyraýda tórt adamnyń ólimine qatysty aıyptalyp otyrǵan Sultan Sarsemalıev sottaǵy sońǵy sózinde ózine taǵylǵan 13 epızod boıynsha aıybyn moıyndaıtynyn aıtyp, ómir boıyna bas bostandyǵynan aıyrýdyń ornyna 25 jyl merzimge sottaýdy surady.
Sottaǵy sońǵy sózinde aıyptalýshy jasaǵan isine ókinish bildirip, oqıǵanyń mundaı qaıǵyly jaǵdaıǵa ulasatynyn boljamaǵanyn aıtty.
– Eshkim adamnan aıýan bolyp týmaıdy. Otbasymdy saqtaımyn degen is-áreketim ýaqyt óte asqynyp, kúrdeli kúreske, arty osy qandy qasiretke ákeletinin boljaǵan joqpyn. Temirdi óz toty, al adamdy óziniń ishindegi ýaıym-qaıǵysy men kegi jeıdi. 13 epızodtyń bárin de moıyndaımyn, talasym joq. Memleket pen Qudaıdyń aldynda ǵana jaýap beremin, – dedi Sultan Sarsemalıev.
Sóziniń sońynda ol sottan ómir boıyna bas bostandyǵynan aıyrý jazasyn emes, belgili bir merzimge jaza taǵaıyndaýdy surady.
– Suraýdyń ózi orynsyz shyǵar, shekti merzimge jaza taǵaıyndaýdy suraımyn. Eń bolmasa balalaryma degen úmitimdi óshirmeńiz. Solar úshin ómir súrýge múmkindik berińiz. Máńgilikke de daıynmyn. Biraq memleket jeke adam emes, kek qýmaıdy ǵoı. Іzgilik, meıirimdilik bolar, – dedi aıyptalýshy.
Aıta keteıik, sot jaryssózi men aıyptalýshynyń sońǵy sózi aıaqtalǵannan keıin sýdıa keńesý bólmesine ketti. Úkimniń naqty qaı kúni jarııalanatyny ázirge belgisiz.
Jaryssózde memlekettik aıyptaýshy sottan Sultan Sarsemalıevti ómir boıyna bostandyǵynan aıyrýdy surady
Marqumdardyń týystary da prokýrordyń sózimen kelisip, bútin bir shańyraqty ortasyna túsirgen kúıeý balaǵa ádil jaza berýdi surady. Jaryssózde aıyptalýshynyń advokaty qylmystyń sebebin Sultan Sarsemalıevtiń psıhologııalyq jaı-kúıiniń nasharlaýymen baılanystyrdy.
Aıyptalýshynyń advokaty Asan Jumabaev qorǵaý sózinde Sultan Sarsemalıev qylmys jasaǵan sátte uzaq ýaqyt boıy jınalǵan psıhoemotsııalyq qysymnyń áserinen áreket etkenin aıtty.
– Onyń boıynda jınalǵan ashý-yza shegine jetip, uzaq ýaqyt boıy sozylmaly stress pen psıhoemotsııalyq qysymda bolǵandyqtan jarylys berdi. Sol sátte ol óz áreketterine tolyq esep bere almaıtyn qatty jan kúızelisi jaǵdaıynda boldy. Ǵylymı tilde muny uzaq ýaqyt jınalǵan ashý-yzadan týyndaıtyn kýmýlıatıvti affekt dep qaraýǵa bolady, – dedi advokat Asan Jumabaev.
Aıta keteıik, Aqbaıan Muqanǵalıevaǵa qatysty «burynǵy kúıeýi Sultan Sarsemalıevtiń asa aýyr qylmysyn jasyrdy» degen kúdik rastalmady. Tergeý barysynda onyń kinási dáleldenbeı, qylmystyq is toqtatyldy.
Buǵan deıin Sultan Sarsemalıevke taǵylǵan aıyptarǵa qosymsha jańa baptar engizilip, qatańdatylǵanyn jazǵan edik.
