Sultan Sarsemalıev bir pyshaqpen úsh adamdy óltirgen
ATYRAÝ.KAZINFORM — 2025 jyly 2 qarashada Sultan Sarsemalıev áıeli men 2022 jyly týǵan qyzyn ertip, Qyzylqoǵa aýdany Jangeldın aýylyndaǵy qaıyn atasynyń úıine barady. Bir kúnnen keıin Násip Óteshqalıeva kúıeý balasynan Aqbaıan men qyzyn tastap ketip, qalǵan jıenderin alyp kelýdi talap etken. Prokýrordyń aıtýynsha, aralaryndaǵy kelispeýshilikke osylaı naqty núkte qoımaq bolǵan.
— Bul talapty estigen Sarsemalıev aralarynda bolyp jatqan kelispeýshilik óz paıdasyna sheshilmeıtinin túsinip, Óteshqalıevanyń talabyn oryndaǵan jaǵdaıda óz anasynyń osy kúnge deıin asyrap kelgen nemerelerinen aıyrylyp qalatynyn túsinip, sol sátte Óteshqalıevany jáne Qarabalındi óltirý týraly sheshim qabyldaǵan, — dedi sot otyrysynda oblys prokýratýrasynyń basqarma prokýrory Mıras Baýyrjanov.
Áıeli men balalaryn Mahambet aýdanyndaǵy úıden tirkeýden shyǵarý kerek degen syltaýmen Maqsot Qarabalınniń bank qosymshasyndaǵy jeke kabınetine kirip, ony óziniń telefonyndaǵy qosymshasyna qosyp alǵan. Sondaı-aq ata-enesin óltirmeı turyp, bankten shot ashyp, zeınetaqyny sol shotqa túsetindeı aýystyryp alǵan.
— 3 qarasha 08:00 shamasynda Óteshqalıeva men Qarabalınniń úı aýlasyndaǵy saraıǵa kirip-shyǵyp júrgenin kóredi. Sarsemalıev saraıǵa kirip, et týraýǵa arnalǵan arnaıy pyshaqty kórip, aldyn ala daıyndap, yńǵaıly jerge qoıyp qoıǵan. 09:00 shamasynda kúdikti ata-enesiniń saraıǵa kirgen sátin kútken. Sol sátte Óteshqalıeva úıden birinshi bolyp shyǵyp, saraıǵa kirgen. Sarsemalıev artynan baryp, zalda úı sharýasyn istep júrgen arqasynan birneshe ret pyshaqtaǵan, — dep tolyqtyrdy prokýror.
Keıin terezeden úıden Maqsot Qarabalınniń úıden shyǵyp, saraıǵa betteginin baıqaıdy. Ony kireberisten kútip alyp, keýdesine, arqasyna jáne qoldaryna birneshe márte pyshaqpen aýyr soqqy jasaǵan.
Sol kúni túnde saraı ishine baryp, kereýettiń astyn qazyp, sol jerge kómip ketken. Marqumdardyń telefondaryn, altyn saqınalaryn, aqshalaı qarjysy men bank kartalaryn menshiktep alǵan.
Aıyptalýshy ózi jasaǵan qylmysty jasyrý maqsatynda aýyldaǵy týystaryna Qarabalın men Óteshqalıevanyń telefondary arqyly Atyraý qalasyna em alýǵa ketip bara jatqanyn jazyp, jalǵan habarlama jibergen. Aldaǵy ýaqytta úıdiń kommýnaldyq kórsetkishterin suraǵan jaǵdaıda ýaqytyly jaýap berip, úıge qaraı kommýnaldyq mekeme qyzmetkerlerin keltirmeý úshin aldyn ala eseptegish quraldardy sýretke túsirip alǵan.
Keıin Meıramgúl Qarabalınaǵa ata-anasynyń emge qalaǵa ketkenin jáne ony shaqyryp jatqanyn aıtyp, sendirgen. Osydan soń tórteýi Atyraý qalasyna qaıtqan.
Kelesi kúni Meıramgúl Qarabalına úıde azyq-túliktiń joqtyǵyn, úıdiń jaǵdaıy nashar ekenin aıtyp, óziniń úıine nemese týystaryna ketý týraly sheshim qabyldaǵan.
— Osy sátte Meıramgúl Qarabalınanyń sózderi Sultan Sarsemalıevtiń ashýyna tıgen. Ózimen birge Qyzylqoǵa aýdanynan alyp kelgen ashana pyshaǵymen Meıramgúl Qarabalınanyń keýdesinen, arqasynan, ishinen birneshe márte aýyr soqqy jasaǵan. Múrdeni kilemge orap, úıdiń kireberis bólmesine shyǵaryp qoıǵan, — dedi dedi prokýror.
Keıin túnde Naýryz Muqanǵalıevti kómgen shuńqyrdy qaıta qazyp, Meıramgúl Qarabalınanyń múrdesin sonda salǵan.
Maqsot Qarabalınge tıesili 4 sıyr, 2 baspaq, 4 buzaý, 17 qoı men 21 eshkini Naýryz Muqanǵalıevtiń atynan satyp jiberýdi maqsat etken.
— 2025 jyldyń 13 qarashasy kúni Jangeldın aýylynyń turǵyny 17 bas qoıdy satyp alatyn bolyp, 950 myń teńgeni Maqsot Qarabalınniń bank qosymshasyna aýdarady. Taǵy bir azamatqa 4 sıyrdy 1 mln teńgege satatynyn jazyp, usynys bildirgen. 10 jeltoqsanda tek 2 sıyrdy 500 myń teńgege alatynyn aıtqan, — dedi prokýror.
Jalpy Maqsot Qarabalınge 1 mln 450 myń teńge materıaldyq shyǵyn keltirilgen.
9 jeltoqsanda Ózbekstan Respýblıkasynyń Tashkent qalasyna Qaplanbek ótkizý pýnkti arqyly ótip, bir kúnnen keıin Tashkent- Kýala Lýmpýr, Kýala Lýmpýr — Balı baǵytyna ushyp ketken.
Keıin olar Indonezııa Respýblıkasynyń Lombok aralyndaǵy Senarý aýylynda qolǵa tústi.
Kúdiktige qatysty QR Qylmystyq kodeksiniń 99-baby 2-bóliginiń 1-tarmaǵyna sáıkes (eki jáne odan da kóp adamdy óltirý), sondaı-aq mal satý, kartalardy jymqyrý derekteri boıynsha osy kodekstiń 188 jáne 190 baptary aıasynda qylmystyq is qozǵalǵan edi.
Buǵan deıin marqumdardyń qyzy men baýyry esepteletin Aqbaıan Muqanǵalıevanyń adam óltirý faktisine qatysy joq ekeni belgili boldy.
Aıta keteıik, búgin qandy qylmysqa qatysty aldyn ala sot otyrysy ótti.
Prokýror Atyraýdaǵy bútin bir otbasynyń ólimine sebep bolǵan janjaldyń qashan, qalaı bastalǵanyn aıtyp berdi.
Eske salsaq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken edi.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde belgili boldy.
Sondaı-aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalanǵan edi.
Aqpan aıynyń basynda kúdiktiniń 5 balasy memleket qamqorlyǵyna alyndy.
Eki kúdiktiniń shetelde qalaı ustalǵany jóninde vıdeo jarııalandy.
Birneshe kúnnen keıin olar Atyraý qalasyna jetkizildi.
Keıin polıtsııa Atyraý oblysy Jangeldın aýylynda bútin bir otbasyny óltirdi degen kúdikke ilingen Sultan Sarsemalıevti ata-enesin óltirgen úıge apardy. Ol tergeýshilerge qylmysty qalaı jasaǵanyn kórsetip, suraqtarǵa jaýap bergen.
Іshki ister mınıstrligi jarııalaǵan vıdeodan Sultan Sarsemalıevtiń qalada jaldap turǵan úıiniń irgesinen qazǵan shuńqyrdy kórsetkenin baıqaýǵa bolady.
Sot medıtsınalyq saraptamasynda jáne tergeý barysynda anyqtalǵan dálelderge sáıkes Naýryz Muqanǵalıevtiń 2025 jyldyń mamyr aıynda qaıtys bolǵany anyqtaldy. Al qalǵan úsheýi qarasha aıynda kóz jumǵany belgili bolǵan edi.
