Sultan Beıbarystyń Kaırdegi meshitin jóndeý jumystary bıyl aıaqtalady
Qazaqstannyń Mysyrdaǵy Elshisi Arman Isaǵalıev MAR Kóne eskertkishter jáne týrızm mınıstri Haled Ál-Annanımen kezdesip, eki el arasyndaǵy týrızm salasyndaǵy yntymaqtastyqty damytý joldaryn qarastyrdy.
Atap aıtqanda, dıplomat sońǵy jyldary Qazaqstannan Sharm al-Sheıh pen Hýrgadaǵa tikeleı charterlik reıster ashylýynyń arqasynda Mysyr kýrorttaryna keletin qazaqstandyq týrısterdiń sany edáýir artqanyn aıtty.
Bıylǵy jyldan bastap, Mysyrda keńinen júrgizilip jatqan aqparattyq-jarnamalyq kampanııanyń arqasynda mysyrlyq týrısterdiń bizdiń elge kelýge degen qyzyǵýshylyǵy da artýda. Osyǵan oraı, Elshi eki el arasyndaǵy týrıstik aǵymdy keńeıtý úshin mysyrlyq áýekompanııalardyń Qazaqstanǵa tikeleı áýe reısterin ashýǵa qolǵabys berýdi surady. H.Ál-Annanı MAR Azamattyq avıatsııamen birlesip bul máseleni jaqyn arada sheshýge ýáde etti. Mınıstrdiń aıtýynsha, qosymsha reısterdiń ashylýy tek ózara týrızmniń ósýine ǵana emes, eki el arasyndaǵy bıznes qatynastary men saýda-ekonomıkalyq yntymaqtastyqtyń jandanýyna serpin beredi.
Buǵan qosa, A.Isaǵalıev Uly Dala Eliniń dańqty perzenti Sultan Beıbarystyń Kaırdegi meshitin qalpyna keltirý jumystaryn jańǵyrtqany úshin Mysyrdyń Úkimeti men Kóne eskertkishter jáne týrızm mınıstrligine zor alǵys bildirdi.
Qazirgi kezde jumystar qarqyndy júrgizilýde. Atalmysh jobanyń bas merdigeri – Mysyr men Taıaý Shyǵystaǵy eń iri «Arab Contractors» qurylys kompanııasy ókilderiniń aıtýynsha, meshitti restavratsııalaý jumystary tolyǵymen 2020 jylǵy shildede aıaqtalýy tıis.
Eske salsaq, ótken jyly Mysyr úkimeti Sultan Beıbarys meshitin qalpyna keltirýge 181 mln fýnt bólgen bolatyn.
