Sultan Beıbarys meshitine qyrýar aqsha bólinse de, eshteńe jasalǵan joq - Jazylbekov
ASTANA. QazAqparat - Parlament Májilisi V shaqyrylymynyń depýtaty Nurlan Jazylbekov Mysyrdaǵy Kaır qalasynda bolyp, Sultan Beıbarys meshitin qalpyna keltirý jumystarymen tanysyp qaıtty, dep xabarlaıdy QazAqparat tilshisi.
"Mysyrda júrgende 1267 jyly el bıleýshisi Sultan Beıbarys salǵan ǵıbadat úıin kórip qaıttyq. Atalǵan nysannyń jalpy aýdany 10 myń sharshy metrdi quraıdy. 2007 jyly Qazaqstan Mysyrmen aradaǵy kelisimniń negizinde meshitti qalpyna keltirý jumystaryna 4,5 mln. dollar bólgen bolatyn. Aqsha bólindi, biraq tıisti jumystar áli aıaqtalǵan joq. Meshittiń qazirgi jaǵdaıyn óz kózimizben kórgennen keıin Ál-Farabı men Sultan Beıbarys atyndaǵy qordyń jetekshisi Sapar Ysqaqovtyń alańdaýshylyǵy oryndy dep sanaımyz. Bizdiń úkimetke osy máseleni baqylaýǵa alý qajet. 10 jyldyń ishinde eshteńe istelingen joq. Sondyqtan osyny jiti qadaǵalaýǵa alǵan jón", - dep jazdy N.Jazylbekov óziniń Feısbýk paraqshasynda. Onyń sózine qaraǵanda, Sultan Beıbarystyń urpaǵy - Samıa Beıbarys ta osy máseleniń sheshilýin qalaıdy. Búginde ol Arab elderi lıgasynda departament basshysy qyzmetin atqaryp júr.
Aıta keteıik, 2007 jyly Memleket basshysy Nursultan Nazarbaevtyń Mysyrǵa jasaǵan resmı saparynan keıin Kaırdegi Sultan Ál-Zaxyr Beıbarystyń meshitin qalpyna keltirý jumystaryn birlesip qarjylandyrý týraly kelisim zańdy túrde bekitilgen edi. Atalǵan qujatqa sáıkes, Qazaqstan qaıtarymsyz negizde 4,5 mln. dollar bólse, Mysyr jaǵy 20 mln. dollardy óz moınyna alǵan.
