Súleımenov jumyssyzdar men ózin-ózi eńbekpen qamtyǵandardy bızneske tartýdy usyndy
Bul týraly búgin Májilistegi Úkimet saǵatynda elimizdiń Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Jalpy alǵanda, eldegi ekonomıkalyq belsendi halyq 8,9 mln. adamdy quraıdy, olardyń ishinde 6,3 mln. adam - jaldamaly jumyskerler, 2,1 mln. - ózin-ózi eńbekpen qamtyǵandar jáne 447 myń adam - jumyssyz halyq. El halqynyń jalpy sanynyń 3 mıllıonnan astamy shaǵyn jáne orta bıznes sektorynda jumyspen qamtylǵan. Ótken jyldyń qorytyndysy boıynsha jumys istep turǵan ShOB sýbektileriniń sany 1,1 mln. birlikti qurady, olar 9 aıda 11,2 trln. teńge somaǵa ónim shyǵardy», - dep atap ótti mınıstr.
Onyń aıtýynsha, ekonomıkadaǵy shaǵyn jáne orta bıznestiń úlesi 24,9 paıyzdy quraıdy. Bul rette Memleket basshysy osy kórsetkishti 2050 jylǵa qaraı 50 paıyzǵa deıin jetkizý mindetin qoıyp otyr. Aıta keterligi, álemdik statıstıkaǵa sáıkes, dúnıejúzi halqynyń 12 paıyzynda ǵana bıznespen aınalysý daǵdysy bar.
«Qarapaıym esep kórsetip otyrǵandaı, Qazaqstannyń ekonomıkalyq turǵyda belsendi halqynyń úshinshi bóligi qazirdiń ózinde shaǵyn jáne orta kásipkerlikpen aınalysady. Osylaısha, Memleket basshysynyń tapsyrmalaryn oryndaý formaldy túrde kásiporyndar sanynyń ósýi esebinen emes, jumys istep turǵan bıznes, shyǵaratyn ónimniń, kórsetetin qyzmettiń sapasyn arttyrý arqyly júzege asyrylýy qajet», - dedi Súleımenov.
Mınıstrdiń deregine sáıkes, eldiń ekonomıkalyq belsendi halqy qurylymynyń 24 paıyzy kiris deńgeıi tómen ózin-ózi jumyspen qamtyǵandardyń joǵary úlesimen sıpattalady. Olardyń 42 paıyzynyń orta nemese bastaýysh bilimi ǵana bar. «Kirisi 60 myń teńgeden tómen ózin-ózi jumyspen qamtyǵandar jáne jumyssyzdar sany 853 myń adamdy quraıdy. Olardyń ishinde aýyldyq eldi mekenderde 716 myń adam turady. Bizdiń paıymymyzsha, azamattardyń dál osy sanaty shaǵyn jáne orta bıznesti damytýdyń qosymsha kózi bola alady», - dedi ol.
