Súleımenov Taıaý Shyǵystaǵy ahýaldyń Qazaqstan ekonomıkasyna áserin atady

— Eksporttyq túsimniń 50 paıyzdan jáne bıýdjet pen Ulttyq qor kiristeriniń 30 paıyzdan astamy munaı esebinen qalyptasady. Sondyqtan, jalpy alǵanda, munaı baǵasy ósken kezde ekonomıkalyq belsendilik artady, ıaǵnı munaı-gaz sektorynyń JІÓ-ge qosatyn úlesi turǵysynan alǵanda Ulttyq qor men bıýdjetke túsetin túsimderdi kóbeıtedi. Bul birden bola salmaıtyndyǵy túsinikti. Munaı naryǵynda kelisimsharttar aldyn ala jasalady. Munda kóp nárse bul áskerı qaqtyǵystyń qansha ýaqytqa sozylatynyna baılanysty bolady, — dedi Tımýr Súleımenov Ulttyq bankte ótken brıfıngte.

Onyń aıtýynsha, munaı baǵasynyń ósýi ishki naryqta valıýta usynysynyń artýyna da yqpal etedi.

— Eger munaı baǵasy joǵary bolyp qala berse, demek bul eksporttyq túsimniń ósetinin bildiredi. Eksporttyq túsim kóbeıgen saıyn naryqta valıýta usynysy da artady. Al bul basqa jaǵdaılar ózgermegen kezde teńgeniń turaqtylyǵyn qoldaıdy, — dedi ol.

Tımýr Súleımenov Taıaý Shyǵystaǵy áskerı qaqtyǵystyń áseri týraly suraqqa jaýap bere kele, munaı baǵasy ósiminiń ekonomıkalyq saldarda bolatynyn atap ótti.

— Áskerı qaqtyǵys — bul árqashan da óte jaman. Biraq onyń ekonomıkalyq saldary bar. Bul jaǵdaıda munaı baǵasynyń ósýi Ulttyq qor men respýblıkalyq bıýdjet kiristerine oń áserin tıgizedi, — dedi Ulttyq bank tóraǵasy.

Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.

Degenmen komıtet bazalyq mólsherlemeni jyldyń ekinshi jartysynda tómendetý múmkindigin qarastyrmaq.