Súleımenov Qazaqstannyń DEF reıtıngindegi kórsetkishin jaqsartý joldaryn atady
«Ózderińiz biletindeı, keshe Dúnıejúzilik ekonomıkalyq forým 2018-2019 jyldarǵa arnalǵan Jahandyq básekege qabilet ındeksiniń jyl saıynǵy reıtıngin resmı túrde jarııalaǵan bolatyn. Reıtıng esebine sáıkes, 140 eldiń ishinde Qazaqstan 59-shy oryn alyp otyr. Reıtıng bıyl jańa format boıynsha eseptelgen. 70 paıyzy jańa ındıktordan turady. Qazaqstan kórsetkishteriniń tómendeýi 4 faktor boıynsha oryn aldy. 3 faktor boıynsha jaıǵasym ózgergen joq. Al álem boıynsha Qazaqstan korporatıvtik basqarý salasyndaǵy aktsıonerlik quqyǵy, taratý jáne qaıta qurylymdaý rásimderinde qoldanylatyn quqyqtyq bazanyń balamalyǵy men tutastyǵy, elektrlendirý dárejesi boıynsha birinshi oryn alǵan», - dedi Tımýr Súleımenov búgin Úkimette ótken baspasóz máslıhatynda.
Ulttyq ekonomıka mınıstriniń aıtýynsha, jekelegen básekege qabilet baǵyttary boıynsha artta qalmas úshin Úkimet birqatar pármendi sharalar qabyldap jatyr.
«Máselen, Memleket basshysy óziniń sońǵy Joldaýynda «Turmys sapasyn arttyrý» atty ekinshi mindeti aıasynda atalǵan salalardaǵy shyǵyndardyń tıimdiligin arttyrýǵa ekpin bere otyryp, bilim berý men densaýlyq saqtaýdy memlekettik qoldaýdy keńeıtýge aıryqsha nazar aýdardy. Innovatsııalyq áleýetti jaqsartý maqsatynda QR 2025 jylǵa deıingi ındýstrııalyq-ınnovatsııalyq damýynyń memlekettik baǵdarlamasy ázirlenedi. Al qarjylyq júıeni jetildirý úshin qarjy salasy men boryshker kásiporyndardy naqty saýyqtyrý, keshendi ınflıatsııaǵa qarsy tıimdi saıasat júrgizý, uzaqmerzimdi teńge nesıeleriniń naqty qoljetimdiligin qamtamasyz etý boıynsha sharalar qabyldanady», - dedi ol.
Tımýr Súleımenov atap ótkendeı, kólik ınfraqurylymyn damytý úshin 2025 jylǵa deıingi «Nurly jol» memlekettik baǵdarlamasyn júzege asyrý jalǵasady. Ekologııalyq jaǵdaıdy jaqsartý maqsatynda ekologııalyq zańnamany buzǵany úshin ákimshilik sanktsııalar mólsherin ulǵaıtýǵa qatysty zańnamaǵa ózgerister men tolyqtyrýlar engiziledi. Quqyq qorǵaý organdarynyń jumysyn túbegeıli jaqsartý jáne azamattardyń qaýipsizdigin qamtamasyz etý maqsatynda ishki ister organyn jańǵyrtýdyń «Jol kartasy» qabyldanady. Ol halyqpen jumys isteýde jańa zamanaýı formatty engizýdi kózdeıdi.
Eske sala ketsek, Dúnıejúzilik ekonomıkalyq forýmnyń Jahandyq básekelestik reıtınginde Qazaqstan eki kórsetkish boıynsha birinshi orynnan kóringenin keshe habarlaǵan edik.
