Súleımenov «Bıznestiń jol kartasy - 2020» baǵdarlamasyna ózgerister engizýdi usyndy

ASTANA. QazAqparat - «Bıznestiń jol kartasy - 2020» baǵdarlamasyna ózgerister engiziledi. Bul týraly búgin Úkimettiń selektorlyq rejimdegi otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«Birinshi - kredıtter boıynsha qubylmaly syıaqy mólsherlemesin engizý. Búgingi kúni kredıtterdi  sýbsıdııalaý ekinshi deńgeıli bankterdiń  19 paıyzdyq ataýly syıaqy mólsherlemesi kóleminde júzege asyrylady. Degenmen, bul parametrler negizi Ulttyq banktiń bazalyq mólsherlemesi shamamen 25 paıyz bolǵanda qalyptasqan edi. Qazir bul mólsherleme 10,5 paıyzdy quraıdy»,-  dedi ol.

Onyń aıtýynsha, ekinshiden 180 mln teńgege deıin kredıtterdi sýbsıdııalaý kezinde oblys ákimderi janynan qurylǵan óńirlik úılestirý keńesiniń maquldaýyn joıý qajet. Úshinshiden, shaǵyn jáne orta kásipkerlik sýbektilerine kredıt boıynsha syıaqy mólsherlemesin sýbsıdııalaýdyń merzimin aǵymdaǵy 3 jyldan  5 jylǵa deıin uzartý usynylady. Tórtinshiden, BJK-2020 baǵdarlamasy aıasynda «Damý» qorynyń kepildikterin kredıt jartylaı maqsatsyz paıdalanylǵan kezde joıý týraly talapty alyp tastaý kerek.

«Besinshi - biryńǵaı baǵdarlamadan iri kásipkerlik sýbektilerin alyp tastaý. Bul biryńǵaı baǵdarlamanyń maqsatyna jáne mindetterine iri kásipkerlik sýbektilerge qoldaý kórsetý jatpaıdy dep sanap otyrǵan Eseptik komıtettiń de pikirine saı keledi. Biz júrgizgen  saraptamaǵa sáıkes baǵdarlama júzege asyrylǵan osy ýaqytqa deıingi aralyqta qarjynyń 25 paıyzy iri kásipkerlik sýbektilerine berilgen. Olardyń QDB, QDB lızıng arqyly qoldaý tetikteri onsyz da jetkilikti», - dedi Súleımenov.