Sýlavesı: Tabıǵı apattardan zardap shekkender sany 2 myńǵa jýyqtady
SÝLAVESI. QazAqparat - Indonezııanyń Sýlavesı aralynda jer silkinisi men tsýnamıden zardap shekkender sany 2 myńǵa jýyqtady. El bıligi beısenbi kúni izdeý-qutqarý operatsııasyn aıaqtaýdy josparlap otyr. Al iz-túzsiz joǵalyp ketkender sany 5 myńnan asty, dep habarlaıdy Euronews.com.
Palý qalasynda keıbir mektepter ashyldy, alaıda sabaqtar áli bastalǵan joq. Aldymen mektepke baratyn balalardyń sanyn eseptep alyp, sodan soń synyptardy sabaqqa daıyndaý kerek. Qalanyń mektepteriniń birine dúısenbi kúni 697 oqýshynyń 50-i ǵana kelgen.
«Biz balalarǵa jaraqattaryn emdep, olardyń rýhtaryn kóterip, mektepke qaıta barýlaryna kómektesemiz. Keshe birneshe oqýshy keldi, biz olardan suramasaq ta olar ózderiniń mekteptegi sabaqtardy saǵynǵandaryn aıtty»,-deıdi Ortalyq Sýlavesı provıntsııasyndaǵy №3 orta mektep dırektory Kasılýdın Tahııa.
Óńirdiń 200 myń turǵynyna gýmanıtarlyq kómek qajet. Jaqynda ǵana tikushaqtar ortalyqtan shalǵaı jatqan aýdandarǵa azyq-túlik pen birinshi kezekte qajet dúnıelerdi jetkizip berdi.
Aıta keteıik, jer silkinisi 28 qyrkúıek kúni saǵat 18-02-de el astanasy Djakartadan 2500 km qashyqtyqta 10 km tereńdikte bolǵan edi. Zilzaladan soń keıbir aýdandarda bıiktigi 1,5 metrlik tolqyndar paıda boldy.
