Sýkýk halyqaralyq qarjy quraly Qazaqstan úshin nesimen utymdy

ASTANA. QazAqparat – Elimizge «Sýkýk» halyqaralyq ıslam qarjy quralyn tartý jaǵy qaralyp jatyr. Onyń máni nede, nesimen utymdy jáne qaı salalarǵa tartylady? Tolyǵyraq Islam azyq-túlik qaýipsizdigi uıymynyń bas dırektory Erlan Baıdáýlet aıtyp berdi, dep habarlaıdy QazAqparat tilshisi.

«Islam azyq-túlik qaýipsizdigi uıymy – aýyl sharýashylyǵy jáne tamaq ónerkásibin damytý ınstıtýty. Eger «Sýkýk» halyqaralyq ıslam qarjy quralyn tartý boıynsha kelisim jasalsa, onda aýyl sharýashylyǵy salasy, logıstıka, ózindik quny boıynsha jobalar qolǵa alynady. Memleket basshysy azyq-túlik eksportyn damytý mindetin qoıyp otyr. Bul baǵytta eksport Taıaý Shyǵys, Parsy shyǵanaǵy elderinde belsendi damyp keledi», - dedi Erlan Baıdáýlet Syrtqy ister mınıstrliginde Islam azyq-túlik qaýipsizdigi uıymynyń uıytqy bolýymen ótken semınar barysynda.

Onyń aıtýynsha, aýyl sharýashylyǵynan bólek «Sýkýk» sertıfıkattary lızıngtik jobalardy damytý baǵytyna da beriledi.

«Búgin atalǵan máseleler talqylanyp, halyqaralyq tájirıbe qaralyp jatyr. Búgingi sharanyń bir ereksheligi – ınvestıtsııa jergilikti valıýtamen tartylady. Qazir álemdik ekonomıkalyq trend – ulttyq ekonomıkany damytý. Dollarsyzdandyrý, ıaǵnı ulttyq valıýta arqyly baǵaly qaǵazdardy tartý qazir búkil álemde júrip jatyr», - deıdi ol.

Aıta ketsek, «Sýkýk» sertıfıkaty – sharıǵatqa sáıkes keletin ámbebap qarjy quraly. Ol – belgili bir jobanyń materıaldyq aktıvterindegi, kórsetiletin qyzmetterindegi, aktıvterindegi bólinbeıtin menshik úlesin kýálandyratyn teń nomınaldy qun sertıfıkaty.