Sýıtsıdtiń aldyn alý úshin ne isteý kerek
ASTANA. KAZINFORM – Dúnıejúzi elderiniń arasynda Qazaqstan sýıtsıd sany boıynsha ókinishke qaraı jetekshi orynda. Ózine qol jumsaıtyndardyń kóbi — 15-19 jas aralyǵyndaǵy jas óspirimder. Mundaı áreketke barýǵa qandaı sebepter ıtermeleýi múmkin? Ony aldyn alýdyń qandaı joldary bar? Osy eki mańyzdy suraqty talqyǵa salaıyq.
Jaqyndarmen qarym-qatynas ár adam balasyna, ásirese, jasóspirimderge turaqty qarym-qatynas kerek. Ár kúnniń qalaı ótkenin, qandaı qyzyqtar, keleńsiz jaıttar bolǵanyn bólisip otyrý óte mańyzdy. Ata-ana balasynyń materıaldyq jaǵdaıyn tolyq qamtamasyz etýge tyrysady. Aqsha negizgi kúnkóris kózi bolǵandyqtan, qazir barlyǵy jumysbasty.
Jumystan qol bosaı qalǵan ýaqytta demalý kerek. Al áńgimelesý, syr shertý múldem bólek dúnıe. Jaqynynyń nazarynan tys qalǵan bala ony syrttan izdeıdi. Úı ishi onyń aralasyp júretin dostarymen tanys bolmaýy da múmkin. Ýaqytynyń basym bóligin áleýmettik jelide ótkizetin bala bos ýaqytta nemen aınalysyp jatqanyn ata-ana taǵy bilmeıdi. Osydan keıin baladan ne kútesiz? Ne nárseden qınalyp, neden qorqyp júrgenin kimge aıtady?
Qysym. Psıhologııalyq qysym balaǵa jan jaqtan kelýi múmkin. Balanyń kóp ýaqyty mektepte ótedi. Ustazdary aýyr sóz aıtyp, ursatyn kezderi bolady. Ár adamnyń qabyldaýy ártúrli. Júregine ár sózdi jaqyn qabyldaıtyn oqýshy ókpe-renishti ózine jınaı beredi.
Ótpeli kezeńde kóp jasóspirim qoldaýǵa muqtaj bolady. Al qoldaý kútken kezde onyń ornyna urys estigen sát-eń qıyny. Bul jerde ustazdarǵa kiná artýǵa bolmaıdy. Sebebi, onyń aldynan túrli oqýshylar da ótedi. Degenmen, ár aıtylǵan sózdiń kıesi bolatynyn umytpaǵan jón. Úlkenderden álimjettik kórsetiletin oqıǵalar da jıi ushyrasady. Balany aınalasyndaǵylar kemsitedi, mazaq qylady, qysym kórsetedi, sógedi. Osynyń ózi jas júrektiń sezimin tabalamaı ma? Qarastyrylǵan máseleler siz úshin usaq-túıek bolyp kórinýi múmkin. Dál osy usaq-túıek adamdardyń taǵdyryn sheship jatqanyn ańǵarmaısyz da. Sol sebepti sýıtsıdtiń aldyn alý úshin atalǵan sebepterge keri amal jasaý kerek.
Aıta ketelik SQO-da volonterler sýıtsıdtik minez-qulyqty anyqtaýǵa úırengen edi.