Sýıtsıdke ıtermeleıdi: AQSh pen Kanada turǵyndary OpenAI ónimine shaǵymdandy
ASTANA. KAZINFORM – AQSh pen Kanadadaǵy otbasylar Kalıfornııa shtatynyń sottaryna tanymal ChatGPT chat-botyn ázirleýshi OpenAI-di sýıtsıdke ıtermeledi dep aıyptap, kompanııaǵa qarsy jeti talap aryz berdi, dep habarlaıdy TASS aqparat agenttigi.
The Wall Street Journal basylymynyń jazýynsha, sot ótinishterine sáıkes, tórt adam, onyń ishinde Djordjııadan 17 jastaǵy jáne Tehastan 23 jastaǵy jasóspirim óz-ózine qol jumsaǵan, al taǵy úsheýi ChatGPT-men ózara árekettesý saldarynan aýyr psıhologııalyq jaraqat alǵan. Talapkerler «chat-botpen uzaq ýaqyt boıy sóıleskennen keıin adamdar keıde óz-ózine qol salýǵa ákep soqtyrǵan sandyraq kúıge túsetinine sendirip otyr. Olar ótemaqy tóleýdi, sondaı-aq áńgimelesýdi avtomatty túrde toqtatýdy qamtıtyn ChatGPT-ke túzetýler engizýdi talap etti.
OpenAI bul jaǵdaıdy «sumdyq» dep atady. Kompanııa ókilderi egjeı-tegjeıin túsiný úshin tıisti qujattardy zerttep jatqanyn málimdedi. OpenAI qazan aıynda chat-botqa ózgerister engizilgenin atap ótti. Bul ózgerister psıhıkalyq densaýlyq máselelerin jaqsyraq tanýǵa jáne olarǵa jaýap berýge, sondaı-aq adamdardy naqty kómekke baǵyttaýǵa múmkindik beredi.
- Biz ChatGPT-tiń erekshe uqyptylyqty qajet etetin máselelerge jaýabyn jaqsartýdy jalǵastyramyz, - dep sendirdi kompanııa ókilderi.
Kazinform úshin arnaıy TASS seriktes agenttigi usyndy.
Osyǵan deıin AQSh-ta ChatGPT jasandy ıntellekti burynǵy Yahoo qyzmetkerin anasyn óltirip, artynsha ózin-ózi óltirýge ıtermelegen bolýy múmkin ekenin jazǵan bolatynbyz.
Buǵan deıin AQSh-ta bir jasóspirim ChatGPT-men óz-ózine qol jumsaý týraly birneshe aı sóıleskennen keıin sýıtsıd jasaǵan. Keıin onyń ata-anasy OpenAI men kompanııanyń bas dırektory Sem Altmanǵa qarsy sotqa aryz bergen.
Sondaı-aq ChatGPT-men jazysýdy sotta paıdalanýǵa bolatynyn habarladyq.
Mamannyń pikirinshe, ChatGPT-den alynǵan aqparatqa tolyq senbeý kerek.