Sýıtsıdke deıin jetkizgen: Eki oblysta bopsalap aqsha talap etetin qylmystyq toptar ustaldy

ASTANA. KAZINFORM — Jastar arasynda paıdakúnemdik pıǵylmen ǵana emes, sonymen qatar erekshe dórekilikpen, menmendikpen jasalatyn, keıde qoǵamdyq rezonans týdyratyn bopsalaý faktileri polıtsııanyń erekshe baqylaýynda, dep habarlaıdy Polisia.kz.

— Ulytaý oblysynda uıymdasqan qylmysqa qarsy kúres basqarmasynyń qyzmetkerleri 18-20 jas aralyǵyndaǵy jastar tobyn ustady. Olar jergilikti kolledjdiń kámeletke tolmaǵan stýdentterin qorqytyp, aqsha bopsalaǵan. Kúdiktiler ózgelerdi qorqytý jáne ózderiniń kúshtiligin kórsetý úshin zorlyq-zombylyq áreketin beınejazbaǵa túsirgen. Bopsalaý jáne buzaqylyq faktileri boıynsha qylmystyq ister sotqa joldandy, — dedi QR ІІM uıymdasqan qylmysqa qarsy kúres departamentiniń ókili Qýandyq Alpys.

Pavlodar oblysynyń polıtsııa departamenti uıymdasqan qylmysqa qarsy kúres basqarmasy prokýratýranyń úılestirýimen mamyr aıynda jastardy bopsalaýmen aınalysqan toptyń áreketine tosqaýyl qoıdy.

Top múshelerine osyndaı 10 faktige qatysy bar degen aıyp taǵylyp otyr. Olar jábirlenýshilerdi qorqytyp, 2 mln teńgege deıin alǵan.

Jábirlenýshiler qylmyskerlerden qorqyp, quqyq qorǵaý organdaryna júginbegen.

Zańsyz árekettiń saldarynan jábirlenýshiler sýıtsıd jasaýǵa deıin barǵanyn atap ótken jón.

Osyndaı oqıǵalardyń birinde qorlyq pen soqqyǵa shydamaǵan 22 jastaǵy jigit ózin-ózi óltirýge oqtalǵan.

Top múshelerin ustaý kezinde olardan travmatıkalyq jáne sýyq qarý, sondaı-aq sıntetıkalyq esirtki tárkilendi. Barlyq kúdikti qamaýǵa alyndy.

 Jábirlenýshilerge qatysty qaýipsizdik sharalary qabyldandy. Qylmystyq kodekstiń birneshe baby boıynsha sotqa deıingi tergep-tekserý júrgizilip jatyr.