Aqmola oblysynda sýıtsıd jasaǵan stýdenttiń ólimi tergelip jatyr
KÓKShETAÝ. KAZINFORM — Aqmola oblysynda óz-ózine qol salǵan sýdenttiń ólimine baılanysty is qozǵaldy.
Aqmola oblysy PD baspasóz qyzmetiniń málimetinshe, qaıǵyly jaǵdaı 14 shildede Qosshy qalasynda bolǵan.
«2007 jylǵy kámelet jasyna tolmaǵan jasóspirimniń óz-ózine qol jumsaý deregine baılanysty Qylmystyq kodekstiń 105-baby 3-bóligi boıynsha sotqa deıingi tergeý amaldary júrgizilip jatyr», — dep túsindirdi Kazinform tilshisiniń saýalyna vedomstvonyń baspasóz qyzmetinen.
Vedomstvodan atap ótkendeı, jasóspirim — Astana qalasynyń turǵyny, Kókshetaýdaǵy kolledjderdiń birinde oqyǵan.
«Tergeý barysynda polıtsııa oqıǵanyń mán-jaıyn anyqtaıdy. Qylmystyq protsessýaldyq kodekstiń 201-babyna sáıkes ózge aqparat jarııa etilmeıdi», — dep tolyqtyrdy vedomstvodan.
Aıta ketsek, budan buryn Qosshyda 6 jasar bala tórtinshi qabattyń terezesinen qulap ketkenin jazǵan edik.
