Sýyq tıgende antıbıotık nege kómektespeıdi jáne ony óz betinshe qabyldaý nesimen qaýipti
ALMATY. KAZINFORM – Almaty №36 qalalyq emhananyń dırektory Gúljaınat Tilegen antıbıotıkterdiń qaýpine baılanysty túsinikteme berdi.
Onyń aıtýynsha, sýyq tıgende tezirek saýyǵyp ketý úshin dárihanadan antıbıotık satyp alýǵa asyǵatyndar az emes. Alaıda antıbıotık ınfektsııanyń barlyq túrine birdeı áser etpeıdi. Ony dárigerdiń taǵaıyndaýynsyz qabyldaý densaýlyqqa zııan keltirýi múmkin.
Al murynnan sý aǵý, jótel, tamaqtyń aýyrýy jáne dene qyzýynyń kóterilýi kóbine jiti respıratorlyq vırýstyq ınfektsııaǵa (JRVI) tán. Antıbıotık bakterııaǵa qarsy áser etedi, biraq vırýsqa áser etpeıdi. Sondyqtan vırýstyq ınfektsııa kezinde ol aýrýdyń jazylýyn jedeldetpeıdi.
- Antıbıotıkti orynsyz ári durys qoldanbaý bakterııanyń dárige tózimdigin arttyrady. Sonyń saldarynan ınfektsııany emdeý qıyndaı túsedi. Odan bólek antıbıotık allergııalyq reaktsııa týǵyzyp, as qorytý júıesiniń jumysyn buzýy jáne basqa da jaǵymsyz áserge ákelýi múmkin, - deıdi Gúljaınat Tilegen.
Ol antıbıotıkti dárigerdiń taǵaıyndaýynsyz qabyldaýǵa, burynǵy emnen qalǵan dárini paıdalanýǵa bolmaıtynyn atap ótti.
Aıtýynsha, dáriniń mólsherin nemese emdeý kýrsynyń uzaqtyǵyn óz betinshe ózgertý durys emes. Al vırýstyq ınfektsııa kezinde tynyǵý, suıyqtyqty jetkilikti mólsherde ishý jáne aýrý belgilerin jeńildetetin dárini jas ereksheligi men densaýlyq jaǵdaıyna qaraı qoldaný kerek.
- Eger naýqastyń jaǵdaıy nasharlasa, dene qyzýy uzaq ýaqyt boıy túspese ne jaǵdaıy jaqsarǵannan keıin aýrý belgileri qaıta paıda bolsa, dárigerge qaralý qajet. Al tynys alý qıyndasa, keýde tusy qatty aýyrsa nemese sana shatassa, shuǵyl medıtsınalyq kómekke júginý kerek. Ásirese kishkentaı balalarǵa, egde jastaǵy adamdarǵa jáne sozylmaly aýrýy bar naýqastarǵa erekshe kóńil bólgen jón, - dedi dáriger.
Eske salaıyq, buǵan deıin Almatyda medıtsınalyq mekemege tirkelý tártibi qandaı ekenin jazǵanbyz.
