Sýyq qarýdyń zańsyz aınalymyna qarsy kúres kúsheıtildi
ASTANA.KAZINFORM — Kúdiktiler tyıym salynǵan zattardy ınternet-dúkender arqyly satyp alǵan. Bul týraly Bas kólik prokýratýrasy habarlady.
Bas kólik prokýratýrasy sýyq qarýdyń, onyń ishinde kastetterdiń zańsyz aınalymyna baılanysty qylmystyń (QK-niń 287-baby) aldyn alý boıynsha keshendi sharalar júrgizip jatyr.
Tergeý amaldary kórsetkendeı, kúdiktiler tyıym salynǵan zattardy ınternet-dúkender arqyly satyp alǵan.
— Mádenıet jáne aqparat mınıstrliginiń Aqparat komıtetimen birlese otyryp, «Satu.kz» marketpleısiniń sýyq qarý jarnamasyn ornalastyrǵany anyqtalyp, ol ÁQBtK-niń 455-baby boıynsha ákimshilik jaýaptylyqqa tartyldy. Internet-alańdar úshin mundaı jarnamany ornalastyrǵany úshin ákimshilik jaýaptylyq qarastyrylǵan, sondaı-aq tyıym salynǵan kontentti buǵattaý sharalary qabyldanyp jatyr, — delingen habarlamada.
Kólik nysandarynda — áýejaılar men temirjol vokzaldarynda — qylmystyq jaýaptylyq týraly plakattar men bannerler ornalastyrylyp, tyıym salynǵan zattardy óz erkimen tapsyrýǵa arnalǵan jáshikter ornatylǵan.
Bas kólik prokýratýrasy azamattarǵa eskertedi: sýyq qarýdy zańsyz ıemdený, berý, ótkizý, saqtaý, tasymaldaý nemese alyp júrý qylmystyq jaýaptylyqqa, al jarnamany ornalastyrý ákimshilik jaýaptylyqqa ákep soǵady. Sýyq qarýdy (sonyń ishinde kastetti) óz erkimen tapsyrǵan adam qylmystyq jaýaptylyqtan bosatylady.
Ushý nemese jolǵa shyǵý aldynda júk pen jeke zattardy muqııat tekserý usynylady.
Aıta ketelik bıyl 118 qarý men 15 granata tárkilendi.
