Sýıtsıdke beıimdilikti anyqtaıtyn otandyq qondyrǵy elordada tanystyrylady
ASTANA. 27 qańtar. QazAqparat - Erteń, 28 qańtarda Astana qalasy Medıtsına kolledjinde otandyq jabdyq - Ámbebap psıhıkalyq dıagnostıkalyq keshenniń (ÁPDK) tanystyrylymy ótedi.
Bul adamnyń psıhıkalyq emotsıonaldy kúıin, sonyń ishinde sýıtsıdke beıimdiligin anyqtaıtyn maquldanǵan psıhologııalyq testiler jıyntyǵy, dep jazady astana.kz Salaýatty ómir saltyn qalyptastyrý ortalyǵynyń baspasóz qyzmetine silteme jasap. «Qazaqstan sońǵy onjyldyqta aıaqtalǵan sýıtsıdter sany boıynsha Reseı men Albanııadan keıin álemde úshinshi oryndy ıelenip kele jatqany jasyryn emes. Beıim faktorlardy (ashýlanshaqtyq, kúızelis, joǵary nevrotızatsııa deńgeıi) anyqtaý óz-ózine qol jumsaý oqıǵalarynyń aldyn alýǵa kómektesedi»,- deıdi ortalyqtaǵylar. ÁPDK zeıin kólemi men jyldamdyǵy, este saqtaý qabileti, jabyǵý, úreı, ashýlanshaqtyq, jeke erekshelikterdi anyqtaýǵa múmkindik beredi. Atalǵan apparat osy saladaǵy biregeı, sertıfıkattalǵan erekshe qondyrǵy, zertteý eki tilde júrgiziledi. «Aqparat qupııa saqtalady. Anyqtalǵan patologııalyq erekshelikter týraly aqparat túzetý jumystaryn júrgizý úshin uıymnyń, JOO psıhologııalyq qyzmetine beriledi»,- dep atap ótti ortalyqtaǵylar.
