Sýhýmı ýnıversıtetinde Abaı atyndaǵy dárishana ashyldy

TBILISI. QazAqparat - Tbılısıdegi Sýhýmı memlekettik ýnıversıtetinde qazaqtyń uly aqyny, oıshyly jáne aǵartýshysy Abaıdyń dárishanasy ashyldy, dep habarlaıdy QazAqparat Qazaqstannyń Grýzııadaǵy Elshiligine silteme jasap.

Dárishananyń ashylý saltanatyna Grýzııa mádenı jáne ǵylymı orta ókilderi, joǵarý oqý ornynyń oqytýshylary men stýdentteri, jergilikti jýrnalıster qatysty.

Atalmysh aýdıtorııa uly aqynnyń mereıtoıy sheńberindegi is-sharalardyń biri retinde QR Grýzııadaǵy Elshiliginiń jáne Qazaqstan-grýzın mádenı-ekonomıkalyq birlestiginiń qoldaýymen jabdyqtalǵan bolatyn. Ol Qazaqstan týraly kitaptarmen, merzimdik basylymdarmen, kompıýterlik tehnıkamen qamtylǵan.

QR Grýzııadaǵy Tótenshe jáne Ókiletti Elshisi Baýyrjan Muhametjanov óziniń sózinde atalmysh dárishanany Qazaqstanǵa ashylǵan «terezege» teńeı otyryp, onyń elimiz týraly aqparattyq ortalyqqa aınalatynyna senim bildirdi.

Saltanat barysynda hákim Abaıdyń óleńderin tuńǵysh ret grýzın tiline aýdarǵan Grýzııa Jazýshylar odaǵynyń tóraıymy, belgili grýzın aqyny Makvala Gonashvılıge QR Prezıdenti Qasym-Jomart Toqaevtyń Alǵys haty tabys etildi. Jınalǵandar grýzın oqyrmandarynyń Abaıdyń máńgilik murasymen óz ana tilinde tanysý múmkindigi eki dostas halyqtar arasyndaǵy ózara tartylys pen túsinistikti tereńdete túsetinine senim artty.