Sýǵa túsý qaýipsizdigin buzǵandarǵa 62 mln teńgeden astam aıyppul salyndy

ASTANA. KAZINFORM – Elimizde sýdaǵy qaýipsizdikti saqtamaǵany úshin ákimshilik jaýapkershilikke tartylǵandar sany 7 ese artqan. Bul týraly TJM Azamattyq qorǵanys jáne áskerı bólimder komıteti tóraǵasynyń orynbasary Aqylbek Ahmetjanov málim etti. 

«Іshki ister jáne Kólik mınıstrlikterimen birlesip sý aıdyndarynda qaýipsizdikti qamtý jáne ólimniń aldyn alý maqsatynda 39 853 reıd pen patrýldeý júrgizildi. Zań buzýshylyqtar Ákimshilik quqyq buzýshylyq týraly kodeksiniń «Ortaq sý paıdalaný qaǵıdalaryn buzǵany» 364-shi, «Sý aıdyndaryndaǵy qaýipsizdik qaǵıdalaryn buzý nemese oryndamaǵany» 412-shi jáne «Alkogoldik ishimdikter ishý nemese qoǵamdyq oryndarda mas kúıinde bolǵany» úshin 440-shi baptary boıynsha ákimshilik jaýapkershilik qarastyrylǵan. Jyl basynan beri zań buzýshylarǵa jalpy somasy 62 mln 608 myń teńgeden asatyn somadaǵy aıyppulǵa 9 myńǵa jýyq hattama toltyryldy», - dedi Aqylbek Ahmetjanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, bıyl Ákimshilik quqyqbuzýshylyq týraly kodekstiń 412-baby boıynsha «Sýdaǵy qaýipsizdikti saqtamaǵandary úshin» ákimshilik jaýapkershilikke tartylǵandar sany 7 ese ulǵaıǵan.

Buǵan deıin TJM ókili elimizdegi qutqarýshylar sanyna qatysty pikir bildirgen edi.

Aıta keteıik, bıyl shomylý maýsymy bastalǵaly 70 adamnyń ajaly sýdan kelgen. Onyń ishinde 30 bala bar.