Sýǵa shomylý maýsymy resmı aıaqtaldy - TJK
NUR-SULTAN. QazAqparat - 1 qyrkúıekte elimizde sýǵa shomylý maýsymy resmı aıaqtaldy, dep habarlaıdy QazAqparat QR ІІM Tótenshe jaǵdaılar komıtetiniń baspasóz qyzmetine silteme jasap.
Sýda adamdardyń qaýipsizdigin qamtamasyz etý maqsatynda TJK polıtsııamen jáne jergilikti atqarýshy organdarymen birlesip uıymdastyrýshylyq, praktıkalyq is-sharalar keshenin júrgizdi. Kún saıyn azamattyq qorǵaý organdary men polıtsııa qyzmetkerleriniń qatysýymen reıdter men patrýldeý júzege asyryldy.
Aǵymdaǵy jyldyń basynan beri elimizdiń sý aıdyndarynda qutqarýshylar 160 adamdy, onyń ishinde 35 balany ajaldan aman alyp qaldy. Al, sýǵa shomylý maýsymy bastalǵannan beri (1 maýsymnan 31 tamyz aralyǵynda) 140 adam, onyń ishinde 27 bala qutqaryldy.
Sonymen qatar, sýǵa shomylý kezeńiniń basynan bastap (1 maýsymnan 31 tamyz aralyǵynda) sýǵa shomylý kezinde alkogoldik mas kúıinde, sýǵa batýshyny qutqarý jáne balalardy eresekterdiń qaraýynsyz qaldyrý kezinde 239 adam (2019 jyly 282), onyń ishinde 75 bala (2019 jyly 88 bala) sýǵa ketip, kóz jumdy.
Tek sýǵa shomylý maýsymynyń sońǵy aptasynda (24-31 tamyz aralyǵynda) Almaty, Aqtóbe, Qostanaı, Aqmola, Jambyl, Pavlodar, Shyǵys Qazaqstan, Qyzylorda oblystarynda, Shymkent qalasynda 14 adam, onyń ishinde 3 bala sýǵa batyp ketken.
Bıylǵy sýǵa shomylý maýsymynda (Almaty - 35, Shyǵys Qazaqstan – 31, Túrkistan oblysy – 23) sýǵa batyp ketken adamdardyń sany kóp boldy.
Elimizde sýǵa shomylýǵa ruqsat etilgen 445 oryn anyqtaldy, 6 020 eskertý belgisi ornatyldy. Adamdardyń sý aıdyndaryndaǵy qaýipsizdigin qamtamasyz etý úshin jeke jaǵajaılardyń 689 qutqarýshy- jasaqshysy oqytyldy.
Polıtsııa departamenti volonterlik uıymdarmen birigip qoǵamdyq oryndardaǵy júris-turys jáne sý aıdyndarynda qaýipsizdik qaǵıdalaryn buzýshylardy anyqtaý boıynsha birlesken reıdter men patrýldeý júrgizdi.
Aǵymdaǵy jylǵy 1 maýsymnan bastap 33 myń reıd jáne patrýldeý júrgizildi, 6 355 adam ákimshilik jaýapkershilikke tartyldy, «Qoǵamdyq oryndarda bolý qaǵıdalaryn buzý» ÁQBK 440-baby jáne «Ortaq sý paıdalaný qaǵıdalaryn buzý» 364-baby boıynsha 14 mln-nan astam teńge aıyppul salyndy.
Reıd is-sharalary barysynda sý aıdyndaryndaǵy qaýipsizdik sharalary boıynsha halyqpen túsindirý jumystary júrgizildi. 499 564 úgit-nasıhat ónimderi (paraqshalar, jadynamalar) taratyldy.
