Sýǵa shomylý maýsymy: ózińizdi, balalaryńyzdy qalaı qaýipsizdendirý kerek, astanada sýǵa túsetin oryndar

NUR-SULTAN. QazAqparat – 1 maýsymda dástúrli túrde sýǵa shomylý maýsymy bastalmaq. Soǵan baılanysty Nur-Sultan qalasynyń TJ boıynsha azamattyq qorǵanys departamentiniń basqarma basshysy Ratbek Demeýbergen astanada qaı jerlerde sýǵa túsýge bolatyny, ózińiz ben balalaryńyzdy qalaı qaýipsizdendirý kerek ekeni týraly eske saldy, dep habarlaıdy QazAqparat tilshisi.

«Bastalǵaly turǵan sýǵa shomylý maýsymyna baılanysty kelesi jumystar atqarylýda. Departamenttiń kúshteri men quraldary daıyn tur. Sýǵa shomylý maýsymyna daıyndyq kezinde qala ákimdigi jáne polıtsııa departamentimen bekitilgen josparlar ázirlendi. Sonymen qatar biz kúsheıtilgen profılaktıkalyq jumys júrgizýdemiz. Atap aıtqanda, adamdardyń sýda qaıtys bolýyn boldyrmaý týraly beınerolıkter shyǵardyq, qoǵamdyq kólikterde adamdardyń qaýipsizdigi týraly jadynama ildik. Qazir, sýǵa shomylý maýsymynyń aldynda 90 tyıym belgisin, sýǵa túsýge tyıym salynǵan jerler belgilengen 30 aqparattyq stend qoıamyz», - dedi maıor Demeýbergen.

Onyń aıtýynsha, kúndelikti reıdter júrgiziledi. Ótken aptanyń ózinde olar 250 jadynama taratyp, 12 ákimshilik hattama qurastyrǵan. Jeke quramnyń 80 adamy jumyldyrylǵan.

«Osy baǵytta jumys kúsheıtiledi», - dep sendirdi Nur-Sultan qalasy TJ boıynsha azamattyq qorǵanys departamentiniń basqarma basshysy.

Sýǵa shomylý maýsymynyń basyna deıin astana ákimdiginiń qaýlysymen sýǵa túsýge ruqsat etilgen oryndar anyqtaldy: Ortalyq jaǵajaı, «Trı peskarıa» jáne «Stolıchnyı dvor» demalys oryndary.

Odan bólek, 20 sýǵa túsýge tyıym salynǵan jerdi bekitý týraly másele talqylanýda.

Balalardyń sýdaǵy qaýipsizdigin qamtamasyz etý úshin astanalyq TJD mekteptermen belsendi jumys jasaýda, túrli onlaın vebınarlar ótkizýde, balalardyń ólimin boldyrmaý boıynsha kitapshalar usynýda.

«Sýǵa shomylý maýsymy áli bastalǵan joq, degenmen qazirdiń ózinde eki adam ólimi boldy: er adam jáne 14 jasar bala. Sondyqtan astana turǵyndary men qonaqtaryn qaýipsizdik erejelerin saqtaýǵa, sýǵa túsýge tyıym salynǵan jerlerge barmaýǵa shaqyramyn, sonymen qatar mas kúıde sýǵa túspeýge, sý qoımalarynda bolýdyń qarapaıym talaptaryn oryndaýǵa keńes beremiz», - dedi Ratbek Demeýbergen.

Ol ata-analardyń óz balasynyń qaýipsizdigine jaýapkershilikpen qaraý kerek ekenin eske saldy. Osyǵan baılanysty TJD qyzmetkerleri ata-analardy balalaryn qaraýsyz qaldyrmaýǵa shaqyrdy.