Sýǵa sekirgen boıjetkendi Qostanaıdaǵy ІІM akademııasynyń kýrsanty qutqarǵan
QOSTANAI. QazAqparat - Qostanaıdaǵy úlken kópirden sekirgen 21 jastaǵy boıjetkendi akademııa tyńdaýshysy qutqaryp qaldy, dep habarlaıdy QazAqparat.
Keshe keshke oqıǵa bolǵan tusta QR ІІM Qostanaı akademııasynyń kýrsanty Erkebulan Tólebekov júrgen.
«Biz jaǵalaý mańynda adam joǵalǵandyǵy týraly habarlandyrý ilip júrgenbiz. Kópir jıeginde bir qyzdyń telefonmen sóılesip turǵanyn kórdik. Kishi kópirge qaraı kele jatqanda onyń sýǵa sekirip bara jatqanyn baıqadyq. Birden polıtsııa beketine baryp, ofıtserlerdi shaqyrdyq», - dedi Erkebulan.
Sol mezette eki jigit qyzdy qutqarmaqqa umtylady. Alaıda, boıjetkendi alyp shyǵa almaǵan. Sálden soń kómekke kezekshilikte júrgen Qostanaı oblysy ІІD jergilikti polıtsııa qyzmetiniń ofıtserleri Saıan Imambaev pen Ádiljan Jomartov keledi.
«Bastapqyda irkilip, bir orynda turyp qaldyq. Lezde sýǵa qalaı sekirip ketkenimdi bilmeı qaldym. Ofıtserler de sýǵa túsip, kómektesti. Qyzdyń shashynan ustap, jaǵaǵa shyǵardyq. Alǵashqy járdem kórsetildi. Keıin jedel járdem qyzmeti kelip, aýrýhanaǵa alyp ketti», - dedi Erkebulan Tólebekov.
Al qazir boıjetken aýrýhanada jatyr. Onymen psıholog jumys isteýde.
