Sýǵa ketken almatylyq áıeldi tabý úshin kanal deńgeıi tómendetildi
ALMATY. QazAqparat - Almatyda ózenge aǵyp ketken áıeldi izdeý úshin Úlken Almaty kanalynyń keıbir jerlerinde sý 1 metrge tómendetildi. Bul týraly QR ІІM TJK resmı ókili Rýslan Imanqulov aıtty, dep habarlaıdy QazAqparat tilshisi.
Onyń aıtýynsha, áıeldiń denesi áli tabylǵan joq.
«Úlken Almaty kanalynyń sýyn azaıtqannyń nátıjesinde keıbir jerlerde sý deńgeıi 1 metrge deıin tómendetildi. Ol jerlerde áıeldiń týysqandary tintip jatyr», - dedi Rýslan Imanqulov.
Onyń aıtýynsha, Esik qalasynyń qutqarý qyzmetine 23 shilde kúni keshki 17:19-da áıel adamnyń sýǵa ketkeni týraly habar kelip túsken.
Baspasóz hatshysy Úlken Almaty kanalynyń kilem jýýǵa emes, egistikti sýarýǵa arnalǵanyn atap ótti. Іzdestirý barysynda týystary kórsetken 18 shaqyrymǵa deıingi aýmaqty súńgýirler tintip shyqty.
«Áıeldiń týystary sýǵarý shlıýzderin tekserýdi talap etti. Alaıda, qaýipsizdik maqsatynda súńgýirler shlıýzderge túsirilmeıtin boldy. Bul óte qaýipti. Bul týraly týysqandaryna da aıtyldy», - dedi R.Imanqulov.
Aıta ketý kerek, 32 jastaǵy Ásııa Musaevanyń denesi búgin úshinshi táýlik izdestirilip jatyr.
Eki balasy bar kelinshek úshinshisine júkti bolǵan. Áıel joldasymen birge Esik bagi atanyp ketken Úlken Almaty kanalyna kilem jýýǵa barǵanda aıaǵy taıyp sýǵa qulap ketken.
Osyǵan uqsas qaıǵyly oqıǵa Astanada qalasynda da bolǵan edi. 43 jastaǵy áıel eki qyzymen birge sýǵa ketip, kóz jumǵan bolatyn. Olar Nura-Esil arnasynyń jaǵasynda kilem jýǵan.
