Sýǵa ketken adamdardyń 70%-y sýǵa túser aldynda alkogoldi ishimdikterdi paıdalanǵan
ASTANA. 31 mamyr. QazAqparat - Astanada sýǵa ketý jaǵdaılary turaqtalyp keledi, dep habarlady Astana qalasynyń Tótenshe jaǵdaılar departamenti sýda qutqarý qyzmetiniń bastyǵy Georgıı Savrýk.
«Byltyr 15 adam sýǵa ketse, onyń ekeýi saıajaı aýmaǵynda, ózen betine muz endi qata bastaǵan kezde sýǵa batqan eken. Olardyń biri - kishkentaı bala. 32 adam tosyn kelgen ajaldan qutqarylǵan. 2011 jyly 14 adam qazasy tirkelgen. Sýǵa batý oqıǵalarynyń birshama turaqtalǵanyn atap ótýge bolady. 2010 jylǵa qaraǵanda, 2012 jyly sýdaǵy apatty jaǵdaı 5-6 adamǵa qysqarǵan», - dep túsindirip ótti G. Savrýk.
Onyń aıtýynsha, kóp jaǵdaıda adamdar sýǵa mas kúıinde túskendikten batyp ketip jatady. «Sýǵa ketý jaǵdaılarynyń 70 %-ǵa jýyǵy adamdardyń sýǵa túser aldynda alkogoldi ishimdikterdi paıdalanǵandyqtan oryn alady. Al 98 %-dan astamy demalýǵa ruqsat berilmegen jerlerde shomylý, tanys emes jerlerde súńgý saldarynan», - dep habarlady G. Savrýk.
Atap óterlik jaıt, jazdyń ystyq kúnderi astanalyq saıabaqtaǵy jaǵajaıǵa kelýshiler sany ortasha eseppen 1500-den 2000-ǵa deıin jetedi eken. 2012 jyldyń jazǵy maýsymynda Nura-Esil kanalynda 2 adamnyń qaıtys bolýy tirkelgen.
