Sýǵa qatysty saralanǵan tarıf engizý merzimi ózgerýi múmkin - Senat
A. Jeltoqsannyń 24-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Tabıǵı monopolııalar jáne retteletin naryqtar týraly» zań jobasyn talqylap, qujatqa túzetýler engizip, Májiliske qaıtardy,
dep habarlaıdy QazAqparat.
Zań jobasy tabıǵı monopolııalar sýbektileri men retteletin naryqtarǵa qatysty tarıf (baǵa) saıasatyn jetildirý maqsatyn kózdeıdi. Sonymen birge, qujat energııa jınaqtaýdy jáne tutynýshylardyń energoresýrstardy tıimdi paıdalanýyn yntalandyrýǵa, jelilerdi jańǵyrtý men jańartýǵa qosymsha ınvestıtsııa tartýǵa jáne aımaqtyq elektr jelileri kompanııalary qarjysyn bosatýǵa, sondaı-aq taýar naryqtarynda básekelestikti damytýǵa múmkindik beredi.
«Elimizdegi tabıǵı monopolııa salasyndaǵy ózekti máselelerdiń biri tehnologııanyń tozýy, óndiristiń artta qaly bolyp tabylady. Dál osynyń saldarynan tıimdilik azaıyp, óndiristik qorlardy jańartýǵa resýrstar jetkiliksiz bolyp otyr. Osy máselelerdi sheshý joldary zań jobasynyń tujyrymdamasynda qarastyrylǵan. Birinshiden, sýdy únemdeýdi yntalandyrýǵa baǵyttalǵan tutyný kólemine qaraı saralanǵan tarıfterdi engizý kózdeledi. Bul norma sýdy utymdy paıdalanýǵa, tutynýshylardyń qarajattaryn, energııany jáne resýrstardy únemdeýge múmkindik beredi. Al kommertsııalyq maqsatta sýdy shamadan tys paıdalanatyn tutynýshylar únemdeý tehnologııalaryn engizýge nemese shekti baǵadan artyq somany tóleýge májbúr bolady. Ekinshiden, óńirlik elektr jelileri kompanııalary úshin salystyrmaly taldaý ádisin qoldana otyryp, tarıfterdi bekitý usynylady. Bul ádistiń máni - kompanııalar arasyndaǵy básekelestikti týdyra otyryp, olardyń qyzmetiniń tıimdiligin arttyrý, jelilerdi jańǵyrtýǵa qosymsha ınvestıtsııa tartý bolyp otyr. Qazir qazaqstanda osyndaı 24 kompanııa bar. Olarda osy ýaqytqa deıin normatıvtik ádis qoldanylyp kelgen», dedi zań jobasy boıynsha baıandaǵan senator Nurlyǵaıym Joldasbaeva.
Májilis maquldaǵan zań jobasyna senatorlar birqatar túzetýler jasady. Onyń biri zań jobasyn qoldanysqa engizý merzimine qatysty bolyp otyr. Esterińizge sala keteıik, Májilis nusqasynda zań jobasynyń (sýǵa qatysty saralanǵan tarıfti engizý) kúshine enýi 2010 jylǵy qańtardyń 1-inen dep qarastyrylǵan bolatyn. Senattyń Bas komıteti buny zań jobasynyń alǵashqy resmı jarııalanymnan keıingi 10 kúnnen keıin engizý qajettigi týraly túzetý engizip otyr.
Qujat Májiliske qaıtaryldy.
