Sýǵa degen kózqarasymyzdy ózgertýimiz kerek - Jeńis Qasymbek
ASTANA. QazAqparat - Sýǵa jáne onyń qundylyǵyna degen kózqarasymyzdy ózgertýimiz kerek. Bul týraly búgin QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.
«Elimizdiń azamattaryn aýyz sýmen qamtamsyz boıynsha memlekettiń maqsatty saıasaty eleýli nátıjelerge qol jetkizdi. Sonymen qatar, sheshimin kútken birqatar máseleler de bar. Birinshiden bul qoǵamnyń sýdy tutynýyna qatysty. Sýǵa degen áleýmettik qatynas tutynýshylyq pen aýyz sýdyń ekonomıkalyq quny arasyndaǵy sáıkessizdikke ákeldi. Bul qoǵamdyq sanada sý qunynyń túsip ketýine sebep boldy», - dedi ol.
Mınıstrdiń aıtýynsha, tarıfterdi áleýmettik turǵydan qalyptastyrý sý arnalaryn qarjylandyrýdyń jetispeýshiligine, júıelerdiń jyldam tozýyna, apatty jaǵdaılardyń kóbeıýine, sýdyń azaıyp, sapasynyń nasharlaýyna túrtki bolǵan.
«Sýmen jabdyqtaý sektorynyń odan ári damýy negizinen naryqtyq qatynastarǵa tolyqtaı qol jetkizýmen baılanysty. Damyǵan elderde sý sharýashylyǵyn basqarý júıesi «paıdalan jáne tóle» qaǵıdaty boıynsha qalyptasqan. Biz sýǵa jáne onyń qundylyǵyna degen kózqarasymyzdy ózgertýimiz kerek», - dedi Jeńis Qasymbek.
Aıta keteıik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótýde. Sharaǵa Májilis Tóraǵasy Nurlan Nyǵmatýlın, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qarjy mınıstri Baqyt Sultanov, múddeli memlekettik organdardyń, ǵylymı-zertteý ınstıtýttarynyń ókilderi qatysýda.
