Sýǵa batyp kete jazdaǵan balyqshy aǵashqa órmelep, aman qaldy
PAVLODAR. QazAqparat - Ertis ózeniniń Bystrýshka aǵysynda balyq aýlap otyrǵan Aqsý qalasyna qarasty Eńbek aýylynyń turǵyny zardap shekti.
5 mamyr kúni saǵat 21.40-ta Pavlodar qalasynyń «112» nómirine oqys jaǵdaı oryn alǵany týraly habarlama túsken, dep habarlaıdy pavlodarnews.kz oblystyq tótenshe jaǵdaılar departamentine silteme jasap.
«Keshke balyq aýlaǵan azamat sý deńgeıiniń kóterilgenin baıqamaı qalǵan. Qaıyǵy bolmaǵandyqtan, aǵashqa órmelep shyǵýyna týra kelgen. Shuǵyl túrde oqıǵa ornyna Aqsý qalasy tótenshe jaǵdaılar bóliminiń jaýapty qyzmetkeri men №7 bólimniń qutqarýshysy qaıyqpen sol jerge shyqty. Alaıda qutqarýshylar jetkenge deıin sol mańaıda balyq aýlaýǵa shyqqan jergilikti turǵyndar er adamdy aǵashtan túsirip, qaıyǵymen qaýipsiz jerge jetkizgen», - delingen habarlamada.
Qutqarýshylar qazirgi tańda Shúlbi GES-inen tabıǵatty qorǵaý maqsatynda sý jiberýdiń nátıjesinde Ertis ózeni jaǵadan shyǵyp, jaıylym jerlerdi sý basatynyn eske salady. Sondyqtan áýesqoı balyqshylarǵa jáne sý aıdyndary mańynda demalýdy unatatyn azamattarǵa keshke qaraı bógelmeýdi jáne sýdaǵy qarapaıym qaýipsizdik erejelerin saqtaýdy suraıdy.
