Sýǵa batyp bara jatqan memlekettiń prezıdenti óz halqyn Fıdjı arhıpelagyna kóshirmek
ASTANA. 9 naýryz. QazAqparat - Sýǵa batyp bara jatqan tynyqmuhıttyq Kırıbatı Respýblıkasynyń ókimeti el halqyn Fıdjı arhıpelagy araldarynyń birine kóshirmek, dep habarlady BBC News.
Kırıbatı prezıdenti Anote Tong búgingi tańda Fıdjı ókimet oryndarymen arhıpelag araldarynyń birin satyp alý jóninde kelissózder júrgizilip jatqanyn málimdedi. Tongtiń aıtýynsha, áńgime Fıdjıdiń kólemi jaǵynan ekinshi Vanýa-Levý aralyn satyp alý jóninde bolyp otyr, onyń aýdany bes myń sharshy shaqyrymnan asady.
Búginde Kırıbatı halqy júz myńnan astam adamdy quraıdy. 33 koralll atolldan turatyn el aýmaǵy birte-birte sýǵa batyp bara jatyr. Birde-bir atoll teńiz deńgeıinen birneshe metrden bıik emes.
Anote Tong Kırıbatıdiń sýǵa batýy klımattyq ózgeristerdiń saldarynan bolyp otyrǵanyn birneshe ret málimdedi. Ol atap aıtqanda, atmosferaǵa parnıktik gazdar shyǵaryndylary boıynsha rekordtyq kórsetkishke jetip otyrǵan elderdiń ókimetteri klımattyń ózgerýinen zardap shegip otyrǵan memleketterdiń halqyna qamqorlyq jasaýlary qajettigin atap kórsetti. Budan buryn Tong óz eliniń turǵyndary úshin jasandy araldar jasaýdy da usynǵan bolatyn.
Fıdjı araldary Kırıbatıden eki myń shaqyrymnan astam jerde ornalasqan. Batyp bara jatqan memlekettiń bıligi halyqtyń bir bóligi Tynyq muhıt aımaǵynyń Avstralııa jáne Jańa Zelandııa sııaqty elderine oryn tebetin ýaqyt keler dep úmittenedi.
Tong kóshi-qon qashan bastalatynyn naqtylaǵan joq. 2009 jyly sarapshylar HHІ ǵasyrdyń sońyna qaraı muhıt deńgeıi 1,1 metrge kóteriledi dep boljam jasady, sol kezde Kırıbatı, sondaı-aq Okeanııanyń basqa da keıbir memleketteri taıaýdaǵy 50 jyldyń ishinde sý astyna ketpek.
Kırıbatı - burynǵy brıtandyq kolonııa. Ekonomıkasynyń negizi - kokos satý jáne balyq sharýashylyǵy. Eldiń kóptegen turǵyndary nápaqa tabý úshin kórshi memleketterge aǵylady. 1979 jylǵa deıin Kırıbatı araldarynyń biri - Banabada fosfat ıgerý jumystary júrgizildi, alaıda bul úlken ekologııalyq problemalarǵa jáne aral halqynyń edáýir bóliginiń kóshirilýine ákep soqty.
