Sýǵa batqan jigitti aman alyp qalǵan polıtseı: Biz kimdi bolsa da qorǵaýǵa, qutqarýǵa daıynbyz

ATYRAÝ. QazAqparat – Kúndiz de, túnde de qoǵamdyq tártipti kúzetetin polıtseıler qatarynda Bolat Dúısenov te bar. Onyń bul saladaǵy eńbek ótili az emes. Іshki ister departamenti tarapynan beriletin shuǵyl ári jedel tapsyrmalardy únemi tyńǵylyqty oryndaıdy. Sondyqtan, basshylar ony jaýapty isterdi atqarýǵa jumsaıdy, dep habarlaıdy QazAqparat.

Ol jurtpen tez til tabysa biledi. Polıtseıler úshin eń qajettisi – elimizdiń túrli zańdaryn da jetik biledi. Onyń qazirgi sheni – polıtsııa polkovnıgi. Qazir jergilikti polıtsııa qyzmetinde eńbek etedi. Jańadan qurylǵan qurylymnyń aǵa ınspektory, polıtsııa polkovnıgi Bolat Dúısenov 2016 jyly Prezıdent Jarlyǵymen «Erligi úshin» medalimen marapattaldy.

Bul marapat oǵan ne úshin berilip edi?

«2015 jyldyń 30 sáýirinde áriptesim Murat Demegenovpen kúndegishe túski as iship, jumys ornyna bet alǵan edik. Qyzmet kóligimizben Jaıyq ózeniniń Azııa betine baǵyt alǵan kezde tosyn oqıǵanyń kýási boldyq. Kópir jaqtaýynda turǵan er adam Jaıyq ózenine sekirip ketti. Ony bireý ıterip jiberdi deýge de kelmeıdi. Óıtkeni, ózenge sekirgen adamnyń janynan eshkim kózge shalynbady. Biz kólikti jedeldetip jaǵadaǵy turaqqa qoıyp, ózenge qaraı júgirdik. Jaǵaǵa jetken soń Jaıyqqa túsip júze jóneldim. Árıne, kıimmen júzý ońaı bolmady. Maqsatym – sýdaǵy adamdy qutqarý. Soǵan jetkenshe asyqtym», - deıdi Bolat Dúısenov.

Bala kúninen sýǵa júzýdiń qyr-syryn meńgergen polıtsııa qyzmetkerine júzý qıynǵa soqpaǵan. Kóktemniń syzy áli qaıta qoımasa da, áp-sátte ózen ortasynda sýǵa bir batyp, bir shyǵyp júrgen jandy ýysyna túsirdi. Sóıtip, ony jaǵaǵa alyp shyqty.

Qyzmettik kıiminen Jaıyq ózeniniń muzdaı sýy sorǵalap, jaǵaǵa jetkenshe áriptesi, polıtsııa podpolkovnıgi Murat Demegenov jedel járdem shaqyryp úlgergen. Dárigerler kelip jetkenshe sýdan qutqarylǵan er adamǵa alǵashqy dárigerlik kómekti de ózderi kórsetken.

«Keıinnen belgili bolǵandaı, Jaıyq ózenine kópirden sekirgen jigittiń jasy 32-de eken. Ony eshkim sýǵa sekirýge májbúr etpegen bolyp shyqty. Degenmen, orda buzar jastan asqan jigittiń júıkesi aýyratyndyqtan, arnaıy esepte turady. Onyń densaýlyǵyndaǵy osy kináraty sýǵa sekirýge sebep bolǵan sııaqty. Biz qoǵamdyq tártip saqshylarymyz, kimdi bolsa da qorǵaýǵa, qutqarýǵa daıynbyz», - deıdi batyl polıtseı Bolat Dúısenov.

Árıne, qyzmet babynda udaıy jedeldik tanytyp, qoǵamnyń da, adamnyń tynyshtyǵyn kúzetetin, qajet kezde basyn qaýip-qaterge tigýden taıynbaıtyn polıtsııa qyzmetkerleri qandaı qurmetke de laıyq.

Ásirese, sol kezdegi polıtsııa podpolkovnıgi Bolat Dúısenovtiń sýǵa batyp bara jatqan jandy qutqarýdaǵy batyldyǵy men jankeshtiligi eskerýsiz qalmady.

Oblystyq polıtsııa departamentiniń basshylyǵy ony memlekettik marapatqa usyndy.