Sýǵa batqan búldirshindi túrkistandyq dárigerler aman alyp qaldy
TÚRKІSTAN. QazAqparat - Túrkistan oblysynda 4 jasar búldirshin abaısyzda sýǵa batyp ketken. Alaıda kishkentaı qyzdy ákesi qutqaryp qalyp, jedel járdem qyzmetin shaqyrtqan, dep habarlaıdy QazAqparat tilshisi.
Keleńsiz jaǵdaı Keles aýdanyna qarasty Oshaqty aýylynda oryn alǵan. Aýlada oınap júrgen Aıarý Ábdiqadyr úıiniń janyndaǵy úlken aryqqa qulap ketken. Búldirshin shamamen 10 mınýttaı sýda qalyp qoıǵan. Ákesi sýdan qyzyn alyp shyqqanda ol kógerip, es-tússiz jatqan.
Oqıǵa ornyna jetken jedel járdem qyzmetkerleri balaǵa alqashqy medıtsınalyq kómek kórsetip, beti beri qaraǵan. Mamandar qyzdyń ókpesinen sý shyqqan soń, ol tynys ala bastaǵan. Osylaısha jedel járdem qyzmetkeleriniń kásibı biliktiligi men kómek kóliginiń qajetti tehnıkamen tolyq jabdyqtalýynyń arqasynda sýǵa batqan búldirshin aman qaldy. Búginde balaqaı Abaı aýylyndaǵy Ortalyq aýrýhanaǵa jetkizilip, dárigerlerdiń baqylaýyna alyndy. Jansaqtaý bóliminde jatqan kishkentaı Aıarýdyń densaýlyǵy jaqsaryp keledi. Ol jansaqtaý bóliminen aýystyrylyp, tıisti em alýyn jalǵastyrýda.
