Sýǵa batqan áıeldi qutqaram dep mert bolǵan polıtseıge eskertkish qoıý usynyldy
ATYRAÝ. QazAqparat - Atyraýlyq eriktiler toby qazirgi zamannyń batyry Shalqar Aqymǵalıevtiń qurmetine eskertkish ornatýdy usyndy, dep habarlaıdy QazAqparat.
Ózgege ómir syılaý jolynda óz ómirin qurban etken atyraýlyq polıtseı Shalqar Aqymǵalıev birinshi sáýir kúni jıyrma bes jasqa tolar edi. Jasyndaı jarq etip sóngen Shalqarǵa bul músheldi kórý buıyrmady...
«Aqyrǵy núkteni Aq Jaıyq qoıǵan sol bir qaıǵyly túndegi oqıǵa júrekterden esh óshpek emes. Ómiriniń sońyna deıin Otan aldynda adal bolý jolyndaǵy azamattyq antyna berik bolǵan Shalqardaı batyrdy tárbıelep ósirgen ata-anasyna bas ıe otyryp, biz, atyraýlyq «Nur Aı» qaıyrymdylyq qorynyń eriktileri mynadaı bastama kóteremiz. Shalqar Aqymǵalıevtiń erligin máńgilik el esinde qaldyrý úshin, oqıǵa oryn alǵan tustan marqumǵa arnalǵan memorıaldyq taqta nemese eskertkish boı kóterýi tıis. Patrıottyq rýhtyń, Otanǵa degen shynaıy qurmettiń qaıtalanbas úlgisin kórsetken Shalqar Aqymǵalıev eskertkish bolyp elge oralýy tıis. Sebebi, beıbit kúnniń batyrynyń aldynda biz máńgilikke qaryzdarmyz...», delingen Atyraýlyq eriktiler taratqan úndeýde.
Eske salsaq, buǵan deıin Atyraýda polıtsııa sýǵa batqan áıeldi qutqaram dep mert bolǵanyn habarlaǵan edik. Qaıǵyly oqıǵa 21 naýryz kúni keshki saǵat 21.52 shamasynda Atyraýda oryn alǵan edi. Patrýldik polıtsııa serjanty Shalqar Aqymǵalıev sýǵa batyp bara jatqan áıeldi qutqarmaq bolyp, ózenge túsedi. Alaıda, polıtsııa qyzmetkeriniń batyl áreketi onyń ómirin úzdi. Shalqar Aqymǵalıevtiń denesi oqıǵa ornyndaǵy aǵystyń tómengi bóliginen tabylyp, jaǵalaýǵa shyǵaryldy.
