Sýǵa batqan adamdy kórgende ne isteý kerek – maman keńesi

ASTANA. QazAqparat –Astana qalasy Tótenshe jaǵdaılar departamenti Azamattyq qorǵanys basqarmasynyń bastyǵy Azamat Qusaıynov ákimdiktiń baspasóz máslıhatynda sýǵa batqan adamdy kórgen jaǵdaıda ne isteý kerektigin túsindirdi, dep habarlaıdy QazAqparat tilshisi.

«Sýǵa batyp bara jatqan adamdy kórgen jaǵdaıda eń birinshi «112» telefonyna habarlaý kerek. Habarlaı tura sol jerdiń mekenjaıyn, adam sýǵa batqan núkteni barynsha naqty ataý kerek», - dedi ol.

Mamannyń aıtýynsha, sýdaǵy adamǵa kómekke umtylmaı turyp mańaıdaǵy adamdardyń nazaryn aýdaryp, oqıǵa ornyna shaqyrý mańyzdy.

«Ekinshiden, jan-jaqtaǵy adamdardy daýystap shaqyryp, kómek uıymdastyrýǵa talpynys jasaý qajet», - deıdi Azamat Qusaıynov.

Aıta keteıik, bıyl Astana aýmaǵynda shomylýǵa ruqsat etilgen 4 oryn belgilenip otyr. Ol oryndardyń mekenjaıyn 2GIS ptalformasy arqyly tabýǵa bolady.