Sýǵa batqan adamdardy qutqarǵan polıtseıler marapattaldy

ASTANA. KAZINFORM – Jetisý oblysy Tótenshe jaǵdaılar departamentinde sýǵa batqan adamdardy qutqarǵan polıtseıler marapattaldy, – dep jazdy Polisia.kz.

23 naýryzda Jetisý oblysy Eskeldi aýdanynda ornalasqan tehnıkalyq sý qoımasynda sýǵa batqan adamdardyń ómirin qutqarý kezinde batyldyq pen janqııarlyq tanytqan polıtseıler Tótenshe jaǵdaılar mınıstrliginiń tarapynan marapatqa ıe boldy.

Qyzmettik mindetterin adal atqaryp, tótenshe jaǵdaı kezinde kásibı sheberlik pen erlik kórsetkenderi úshin Tótenshe jaǵdaılar mınıstrliginiń «Sýǵa batqan adamdardy qutqarǵany úshin» medali Jetisý oblysy polıtsııa departamenti Eskeldi aýdany polıtsııa bóliminiń krımınaldyq polıtsııa bólimshesiniń aǵa jedel ýákili Ómirbek Senbaı men patrýldik polıtsııa qyzmetiniń aǵa ınspektory Muhtar Nurmuhanbetovke tabystaldy.

Oqıǵa kezinde tártip saqshylary óz ómirlerine tóngen qaýipke qaramastan, sýǵa batyp bara jatqan azamattardy aman alyp qalǵan. Olar kásibı áreket etý arqyly tótenshe jaǵdaıdyń qaıǵyly aıaqtalýyna jol bermedi.

Atalǵan marapat – polıtsııa qyzmetkerleriniń qoǵam aldyndaǵy boryshyn abyroımen atqaryp júrgeniniń jarqyn dáleli.

Buǵan deıin sýǵa batyp bara jatqan balany qutqarǵan stýdent marapattalǵanyn jazǵan edik.