Sýǵa batyp kete jazdaǵan jasóspirimdi qutqarǵan qyzylordalyq marapattaldy
QYZYLORDA. KAZINFORM — Qyzylorda qalasynyń ákimdigi Syrdarııa ózeninde sýǵa batyp kete jazdaǵan jasóspirimdi qutqaryp qalǵan Nıkolaı Gaıdaıǵa qurmet kórsetti.
Ákimdiktiń baspasóz qyzmeti habarlaǵandaı, oqıǵa kezinde birneshe jasóspirim ózen jaǵasynda shomylyp júrgen.
— Sol sátte ózen jaǵasynda balyq aýlap otyrǵan Nıkolaı Gaıdaı jasóspirimniń ómirine qaýip tóngenin der kezinde baıqap, esh oılanbastan kómekke umtylǵan. Nátıjesinde jasóspirimdi jaǵaǵa aman-esen shyǵaryp, onyń ómirin saqtap qaldy. Azamattyń batyl áreketi men joǵary jaýapkershiligi eskerilip, oǵan qala ákiminiń alǵys haty men arnaıy syı-sııapaty tabys etildi, — delingen habarlamada.
Oqıǵa Syrdarııa ózeniniń shomylýǵa ruqsat etilmegen aýmaǵynda bolǵan. Qutqarýshylar osy oraıda turǵyndardy sýdaǵy qaýipsizdik talaptaryn qatań saqtaýǵa, balalardy qaraýsyz qaldyrmaýǵa jáne tek arnaıy belgilengen oryndarda shomylýǵa shaqyrdy.
Al jaqynda biz Aqtóbede bir kúnde úsh adam sýǵa batyp ketkenin jazdyq.
