Sýǵa batyp bara jatqan balany qutqarǵan stýdent marapattaldy
ASTANA. KAZINFORM — QR TJ mınıstriniń buıryǵymen sýǵa batyp bara jatqan balany qutqarý kezinde kórsetken batyldyǵy, janqııarlyǵy úshin Qazaqstan-Amerıka Erkin ýnıversıtetiniń 2 kýrs stýdenti Erasyl Omarhanov «Sýǵa batqandardy qutqarǵany úshin» medalimen marapattaldy.
Esterińizge sala keteıik, oqıǵa bıyl 13 mamyrda bolǵan. Erasyl Omarhanov Úlbi ózeninde sýǵa batyp bara jatqan balany qutqaryp qaldy.
Bala ápkesimen ózen jaǵasynda serýendep júrgen kezde sýǵa qulap ketken, sýdyń aǵysy ony alyp kete bastaǵan. Mınıstrliktiń baspasóz qyzmeti málimetinshe, Erasyl der kezinde qasynda bolyp, balany qutqaryp qaldy.
- Qazaqstan TJ mınıstriniń atynan kórsetken erligi úshin alǵys aıtamyz! Bizdiń óńirde óskeleń urpaqtyń laıyqty úlgi alatyn osyndaı batyrlary baryna qýanyshtymyn! - dep atap ótti vedomstvolyq marapatty tabystaǵan ShQO TJD bastyǵy Rashıd Blıalov.
Óskemende ata-anasynyń qaraýynsyz qalǵan búldirshindi aman alyp qalǵan Erasyl Omarhanov marapattalǵanyn jazǵan bolatynbyz.
Úlbi ózeninde batyp bara jatqan balany aman alyp qalǵan Erasyl Omarhanovpen Óskemen qalasynyń ákimi Almat Aqyshov kezdesti. Beıbit kúnniń batyry búginde Qazaqstan-Amerıkandyq Erkin ýnıversıtetinde «Psıhologııa» mamandyǵynda bilim alyp jatyr.
Ákim Erasyl Omarhanovqa Alǵys hat pen aqshalaı syılyq tabystady. Sonymen qatar «AN Group» kompanııasy 2-shi kýrsta oqyp jatqan stýdenttiń qalǵan oqý aqysyn tólep beretinin jetkizdi.