Sýǵa aǵyp bara jatqan qyzdy qutqaramyn dep qaza tapqan pavlodarlyq marapattaldy

PAVLODAR. QazAqparat – Kishkene qyz balany qutqaramyn dep Ertis ózenine sýǵa ketken Marat Rahymjanov marapattaldy. Medaldi marqumnyń otbasyna Pavlodar oblysy TJD bastyǵy tabystady, dep habarlaıdy QazAqparat departamenttiń baspasóz qyzmetine silteme jasap.

«3 tamyzda túste «Jyly jaǵajaıdyń» qoǵamdyq qutqarýshysynan jaǵajaı aýmaǵynan er adamnyń sýǵa batyp ketkeni týraly habarlama kelip tústi. Oqıǵa ornyna dereý Pavlodar oblysy TJD Jedel-qutqarý jasaǵynyń qutqarýshylary jiberildi. Mán-jaıdy anyqtaý barysynda 59 jastaǵy Marat Rahymjanov sýǵa batyp ketkeni anyqtaldy. Ol batyp bara jatqan 11 jastaǵy qyz balany qutqarmaq bolǵan. Marat Rahymjanov shomylý belgisiniń syrtyna aǵys alyp ketken qyzdy qaýipsiz aımaqqa ıterip jibergen. Alaıda ózi tereńnen shyǵa almaı qalǵan», delingen habarlamada.

Jaǵaǵa shyǵarylǵan qyzǵa medıtsınalyq kómek qajet bolmaǵan.

5 tamyzda jedel-qutqarý jasaǵynyń qutqarýshylary Pavlodar qalasynyń avtojol kópiri mańynda Marat Rahymjanovtyń denesin taýyp, sýdan alyp shyqty.

Búgin, 3 qyrkúıekte Pavlodar oblysy Tótenshe jaǵdaılar departamenti bastyǵynyń mindetin atqarýshy Meırambek Batyrqulov marqum Marat Rahymjanovtyń otbasyna bardy. Meırambek Batyrqulov marqumnyń týystary men jaqyndaryna kóńil aıtty. QR Tótenshe jaǵdaılar mınıstri ıÝrıı Ilınniń buıryǵymen Marat Rahymjanovtyń otbasyna «Sýǵa batqandardy qutqarǵany úshin» medalin tabystady.

Osy sharaǵa marqumnyń «QTJ - Júk tasymaly» JShS «Pavlodar BP bólimshesi» basshylyǵy men qyzmetkerleri qatysty. Onyń áriptesteri Marat Rahymjanovty adal jáne jaýapty qyzmetker retinde sıpattap, jaqsy adam ekenin aıtty.