Sýets kanalyndaǵy keme qozǵalysy qaıta jandandy
NUR-SULTAN. QazAqparat - Sýets kanalynda Ever Given konteıner tasýshy kóldeneń qaırańdap qalǵannan keıin bir aptadan soń onda kemeler qozǵalysy qaıta jandandy, dep habarlaıdy QazAqparat dw.com-ǵa silteme jasap.
Dúısenbi túnde kanal ákimshiligi sý arnasyna 110-nan astam keme shyǵady dep habarlady. Kanalǵa taıaý tusta birneshe júzden astam keme jınalyp qalǵan.
Triple E sanatyna jatatyn 400 metrlik konteıner tasýshy MV Ever Given Sýets kanalynyń ońtústik bóliginde 24 naýryzǵa qaraǵan kúni qaırańǵa turyp qaldy. Qytaıdan Nıderlandyǵa qaraı bettegen keme kúre sý jolynyń eki jaǵyndaǵy qozǵalysty tolyqtaı buǵattap tastady. Konteıner tasýshyny jaldaǵan taıvandyq Evergreen kompanııasy bul jaǵdaı aýa raıynyń qolaısyzdyǵynan týyndady dep otyr. Qatty jel ekpinimen keme óz baǵytynan aýytqyp ketken.
Qutqarý komandalary konteıner tasýshyny 29 naýryzǵa qaraǵan túni qaırańnan shyǵardy. Ol úshin júk tasýshy kemeniń aınalasyn tereńdetip qazýǵa týra keldi.
1869 jyly ashylǵan Sýets kanaly Taıaý Shyǵystan Eýropa men AQSh-qa munaı tasymaldaıtyn mańyzdy marshrýtqa aınalǵan. Álemdegi eń mańyzdy saýda marshrýty sanalady. Onyń úlesine ǵalamdyq teńiz saýdasynyń 10 paıyzy keledi.
