Sýets kanalynda alyp kemeniń qaırańdap qalýy taýar jetkizý daǵdarysyn týdyra bastady
EGIPET. QazAqparat – Ever Green atty úlken konteıner tasymaldaýshy keme Sýets kanalynda qaırańǵa turyp qalǵan bolatyn. Sonyń saldarynan bolǵan keptelis taýarlardy jetkizý tizbegindegi daǵdarystyń shıelenisý qaýpin tóndirdi, dep habarlaıdy QazAqparat Washington Times-qa silteme jasap.
Bul jaǵdaı taýarlardy jetkizý tizbegindegi daǵdarysty odan ári ýshyqtyrýy múmkin. Munaı men Shyǵys Afrıkanyń kofe burshaqtarynyń baǵasy juma kúni jetkizilimniń toqtaýyna baılanysty qymbattady dep habarlandy.
Eger Sýets kanalynyń tosqaýyly tez joıylmasa, álemdik ekonomıka zardap shegýi múmkin, óıtkeni munaı-hımııa ónimderin, kıim-keshekti, ónerkásiptik jáne basqa taýarlardy jetkizý merzimderi buzylady.
Allianz ınvestıtsııalyq kompanııasynyń málimetteri boıynsha, álemdegi júk tasymalynyń shamamen 13 paıyzy jyl saıyn Sýets kanaly arqyly ótedi.
Germanııanyń Hapag Lloyd kompanııasy habarlaǵandaı, kompanııanyń alty iri júk kemesi kanal arqyly tasymaldyń jandanýyn kútip tur, al kompanııanyń taǵy alty kemesiniń baǵyty ózgertilip, Afrıkanyń ońtústik shetinen ótedi. HMM Rotterdam - baǵytyn ózgertken kemelerdiń biri, Afrıka kontınenti arqyly uzaq jáne qymbat jolǵa bet aldy.
Kopengagendegi SeaIntelligence Consulting kompanııasynyń atqarýshy dırektory Lars Djensen óziniń habarlamasynda kompanııalar Sýets kanalyndaǵy jaǵdaıdy tez arada sheshýge pessımıstik kózqaraspen qaraıdy dep málimdedi.
Bul jaǵdaı júk tasymaldaýshylardyń qyzmetteri baǵasynyń ósýine soqtyrýy yqtımal, bul ınflıatsııaǵa ákelýi múmkin. Birneshe aptadan keıin tasymaldaýshylar bólshek saýda kásiporyndarymen jáne óndirýshimen tasymaldaý tarıfteriniń ósýine qatysty kelissózderdi bastaıdy delingen.
Uzyndyǵy 193 shaqyrymdy (120 mıl) quraıtyn Sýets kanaly álemdegi júktemesi eń kóp sý joldarynyń biri.
