Sýdyń tapshy resýrs ekenin túsinýimiz kerek – Astanada arnaıy kórme ashyldy
«Teńiz deńgeıiniń kóterilýi, Ortalyq Azııanyń kóptegen bólikterine qaýip tóndiretin qurǵaqshylyq jáne kún raıynyń qolaısyzdyǵy jıilep barady. Osy mindetterdi sheshý úshin barshamyzǵa birlik pen yntymaq qajet. Biz birge adamdar men ekojúıelerdiń jańa shyndyqqa beıimdelý jáne klımattyń ózgerýine tózimdilik qabiletin arttyra alamyz. Sýdyń tapshy resýrs ekenin túsinýimiz kerek», - dedi Nıderland Koroldiginiń elshisi Andre Karstens Maqsut Narikbayev University-de ótken kórmede.
Tájikstan Respýblıkasynyń elshisi Haırýllo Ibodzoda Ortalyq Azııa aımaǵy da BUU Sý konferentsııasyna daıyndyqqa belsendi qatysyp jatqanyn atap ótti.
«Bizdiń elderimiz jahandyq jáne halyqaralyq kezdesýler aıasynda túrli sessııalar, is-sharalar, kórmeler uıymdastyrdy. Bul sharalardyń nátıjesinde Halyqaralyq Araldy qutqarý qory basqarmasynyń sheshimimen bekitilgen BUU Sý konferentsııasyna birlesken málimdeme ázirlendi», - dedi ol.
«Water=Life» kórmesinde álemniń túkpir-túkpirinen kelgen fotosýretshilerdiń 19 úzdik týyndysyn kórýge bolady, bul jer sharyndaǵy bizdiń ekologııalyq izimiz týraly oılandyryp, sý máselelerin jaqsyraq túsinýge kómektesedi. Onyń ishinde Tájikstannan kelgen 11 ádemi týyndymen tolyqtyrylyp, fotosýretter sý resýrstarynyń aýqymy men sulýlyǵy kórsetedi.
Kórmeniń ashylýyna Ózbekstan, Qyrǵyzstan, Túrikmenstan, Ispanııa elshileri jáne Ýkraına isterindegi ýaqytsha senim bildirilgen ókil qatysty. Sondaı-aq, QR Syrtqy ister mınıstrligi, Memlekettik qyzmet akademııasynyń ókilderi, Italııa, Portýgalııa, Frantsııa elshilikteriniń dıplomattary jáne sarapshylar qatysty.
Óz kezeginde ýnıversıtettiń basqarma tóraǵasynyń orynbasary Aınur Káribozova bul bastamaǵa sebepkerlerdiń biri bolǵanyn erekshe maqtan tutatynyn aıtty.
«Sý adam densaýlyǵy, ekonomıkalyq damý jáne ekologııalyq turaqtylyq úshin óte mańyzdy. Onyń jetispeýshiligi nemese lastanýy bárimizge aýyr zardaptar ákelýi múmkin. Sonymen qatar, bizdiń ýnıversıtet SDSN múshesi retinde BUU-nyń Turaqty damý maqsattarynyń damýyn qoldaıdy», - dedi A. Káribozova.
