Sýdyń kelýin ıiskep bile almaımyz - «Qazsýshar» ókili
AQTÓBE. QazAqparat - Aqtóbe qalasy mańyndaǵy úsh sý qoımasy tolyp, qazir kelgen sý ózenderge aǵyzylyp jatyr. «Qazsýshar» RMK Aqtóbe bólimshesi úsh kúnde lap etken sýdyń boljamyn durys jasamaǵan «Qazgıdromed» RMK-ǵa ókpeli, dep habarlaıdy QazAqparat tilshisi.
Aqtóbedegi Sazdy, Aqtóbe, Qarǵaly sý qoımalary tolady degen jospar bolǵanymen, kelgen sýdyń aǵyny munshalyqty kóp bolatynyn jaýapty mamandar da boljaı almaǵan. Sonyń saldarynan qazir sý qoımalaryna kelip jatqan sýdyń bári aǵyzylyp jatyr. Sebebi, qoımanyń bári tolyp tur.
«11 sáýirden bastap Aqtóbe oblysyna kólemi 500 mıllıon tekshe metr sý keldi. Sý Aqtóbe, Sazdy, Qarǵaly sý qoımasyn toltyrdy. Qazir kelgen sýdyń bárin tómen qaraı tastap jatyrmyz. Daǵdarys ótti, degenmen sýdyń kelýi toqtaǵan joq. Biz árbir eki saǵat saıyn qarap, baqylap otyrmyz», - dedi «Qazsýshar» RMK Aqtóbe bólimshesiniń basshysy Bekzat Nametov.
Uzaq jyldar boıy Aqtóbedegi sý qoımalarynda jumys istep júrgen bilikti maman sýdyń mol kelýi 1993 jyly tirkelgenin aıtady. Ol kezde barlyǵy 966 mıllıon tekshe metr sý kelgen eken.
«Qazir 500 mıllıon tekshe metr sý kelip tur. 1 mamyrǵa deıin taǵy 200 mıllıon tekshe metr sý keledi. Kópshilik «nege aldyn ala jibermedińder» dep suraıdy. Sý tasqyny bastalar aldynda Aqtóbe sý qoımasynda 68 paıyz, Qaraly sý qoımasynda 57 paıyz qor boldy. «Qazgıdromed» RMK 120-240 mıllıon tekshe metr sý keledi dep boljam aıtty. Ádette aqparattyń 80 paıyzy dál keletin edi. Biraq sý úsh kúnde lyq ete qaldy. Óz kinámizdi bireýge ıterip salmaımyz. Sheshimin tappaǵan másele de bar. Máselen, gıdrobekettiń sanyn 95-ten 25-ke deıin azaıtty. Bárin qaıta ornyna keltirý kerek. Olar Sý resýrstary komıtetine qarady, «Qazgıdromet» Qorshaǵan ortany qorǵaý basqarmasynda boldy. Al bizdi Aýyl sharýashylyǵy mınıstrligine jiberdi de sonynda tarap kettik. Bári qosylmasa, bolmaıdy. Biz óz erkimizben aldyn-ala boljaı almaımyz. Ony «Qazgıdromet» pen gıdrobeket qaramaǵanda qaıdan bilemiz? Iiskep bilemiz be?»,- dedi Bekzat Nametov. Mamannyń aıtýynsha, sý arnasyndaǵy jer bos jatýy tıis. Sol kezde sý óz jolymen aǵady.
