Sýdıanyń kásibı qyzmetin baǵalaý ádistemesine túzetýler engizildi
ASTANA. KAZINFORM — Joǵarǵy Sottyń jalpy otyrysy Sýdıanyń kásibı qyzmetin baǵalaý ádistemesine túzetýlerdi bekitti.
Joǵarǵy Sot tóraǵasy Aslambek Merǵalıev joǵary sot organynyń kezekti jalpy otyrysyn ótkizdi.
Otyrysqa Joǵarǵy Sottyń sot alqalarynyń tóraǵalary men sýdıalary qatysty.
Otyrys barysynda Jalpy jáne keńeıtilgen jalpy otyrystarynyń reglamentine túzetýler, sondaı-aq Sýdıanyń kásibı qyzmetin baǵalaý ádistemesiniń jobasy qaraldy.
Qatysýshylar aldynda sóılegen sózinde A.Merǵalıev zańnamadaǵy túzetýler Reglamentke ózgerister engizý qajettigin atap ótti.
— Atap aıtqanda, qyzmettik mindetterin tıisinshe oryndamaǵany úshin tártiptik is júrgizý aıasyndaǵy olardyń áreketterin tekserý úshin sottardyń jáne alqalardyń tóraǵalaryna qatysty materıaldardy Sot jıýrıine berý týraly sóz boldy. Sondaı-aq, Sot jıýrıine sot isterin qaraý kezinde zańdy óreskel buzǵany úshin oblystyq sottardyń, alqalar tóraǵalaryn, Joǵarǵy Sottyń sýdıalaryn nemese alqalar tóraǵalaryn tártiptik jaýapkershilikke tartý nemese tartpaý týraly usynym berý múmkindigi qaraldy, — delingen vedomstvo habarlamasynda.
Budan basqa, Reglamentke túzetýlerdiń qajettigi kassatsııalyq sottardyń qurylýyna, Sot jıýrıiniń jáne Sot tóreliginiń sapasy jónindegi komıssııanyń quramynyń ózgerýine de baılanysty týyndady.
Joǵarǵy Sottyń sýdıasy, Sot tóreliginiń sapasy jónindegi komıssııanyń tóraǵasy Arystanbek Stybaev Sýdıanyń kásibı qyzmetin baǵalaý ádistemesine engizilgen ózgerister sot tóreligin júzege asyrýǵa baılanysty emes birqatar ólshemshartty alyp tastaıtynyn (moraldyq jáne iskerlik qasıetter, sottan tys jumys júkteme), óıtkeni olar basqa sot organdarynyń, ıaǵnı Sot jıýrıi, Ádep jónindegi komıssııa, jalpy otyrys fýnktsııalaryn qaıtalaıtynyn atap ótti. Bul Komıssııaǵa negizgi kórsetkish — sot tóreligin sapaly júzege asyrýǵa múmkindik beredi.
Jańartylǵan Ádistemege sáıkes, Sýdıanyń kásibı qyzmetin baǵalaý kelesi ólshemsharttar boıynsha júzege asyrylatyn bolady:
* kásibı bilimi jáne ony isterdi qaraýda qoldana bilýi;
* sot qyzmetiniń nátıjeleri.
Barlyq sandyq kórsetkish arnaıy statıstıkalyq IT-modýlimen avtomatty túrde jasalady. Qujat Joǵary Sot Keńesimen kelisilgen, sýdıalarmen pysyqtalǵan, bul rette kelip túsken barlyq usynystar eskerilgen.
A.Stybaev atap ótkendeı, Sot tóreliginiń sapasy jónindegi komıssııa jyl saıyn barlyq satydaǵy 400-den astam sýdıanyń qyzmetine baǵalaý júrgizedi. 2019 jyldan beri 2416 sýdıa kásibı baǵalaýdan ótti.
Talqylaý qorytyndysy boıynsha otyrysqa qatysýshylar engizilgen túzetýlerdi bekitti. Jańartylǵan qujat Joǵarǵy Sot saıtynyń «Zańnama» bóliminde jarııalanady.
Eske salsaq, osyǵan deıin Memleket basshysy Joǵarǵy Sot tóraǵasy Aslambek Merǵalıevti qabyldady. Prezıdentke sot júıesi qyzmetiniń byltyrǵy qorytyndylary týraly málimet berildi.