Sýdıany tyńdamaǵan Bıshimbaevtyń advokatyna qatysty sot sheshimi shyqty

ASTANA. KAZINFORM – Eks-sheneýnik Qýandyq Bıshimbaevqa qatysty qylmystyq isti qaraý barysynda birinshi satydaǵy sot onyń advokaty Erlan Ǵazymjanovqa jeke qaýly shyǵardy. Bul týraly elorda sotynyń baspasóz qyzmeti habarlady.

Eske sala ketsek, burynǵy mınıstr Qýandyq Bıshimbaevtyń sot otyrysynda onyń advokaty Erlan Ǵazymjanov sýdıa tarapynan birneshe ret eskertý alǵan edi.

«Advokat Erlan Ǵazymjanov is júrgizý kodeksiniń talaptaryn bile otyryp, sýdıa aıtqan talaptarǵa baǵynbaı, sot otyrysy zalynda tártipti buzdy. Osylaısha, advokat sýdıaǵa qurmetsizdik tanytyp, sotqa nemquraıly qarady. Advokattyń atynan túsken jeke shaǵymnyń dálelderi rastalmady, óıtkeni tóraǵalyq etýshi sýdıa QR Qylmystyq is júrgizý kodeksi 57-babynyń talaptaryn saqtaı otyryp sot otyrysyn ótkizdi», - delingen habarlamada.

Osylaısha, Astana qalalyq soty qylmystyq ister jónindegi sot alqasynyń 2024 jylǵy 28 mamyrdaǵy qaýlysymen advokat E.Ǵazymjanovqa qatysty birinshi satydaǵy sottyń sheshimi ózgerissiz qaldyryldy, ıaǵnı advokattyń jeke shaǵymy qanaǵattandyrylmady.

Sondaı-aq, elorda soty atalǵan aktiniń zańdy kúshine engenin aıtyp otyr.

Aıta keteıik, buǵan deıin Q.Bıshimbaevqa qatysty qylmystyq is boıynsha elorda sotyna apellıatsııalyq shaǵymnyń túskenin habarlaǵan edik.