Sýdıalardy irikteýge arnalǵan aqparattyq júıe engizedi
ASTANA. KAZINFORM — Joǵary sot keńesi sýdıalardy irikteýge arnalǵan menshikti aqparattyq júıe engizedi. Bul týraly Joǵary sot keńesiniń múshesi Janat Ospanova aıtty.
— Sýdıalardy irikteýge arnalǵan menshikti aqparattyq júıeniń 5 negizgi modeli ázirlendi. Osy jyldyń ekinshi jartysynda bul júıeni konkýrstarǵa qatysý úshin qujattardy qabyldaý bóliginde pılottyq rejımde iske qosý josparlanyp otyr. Keıin synaq nátıjesine qaraı ony biliktilik emtıhanynyń rásimderine kezeń-kezeńmen engizý kózdelgen. Bul júıe qaǵaz aınalymyn barynsha qysqartýǵa, kadrlyq protsesterdiń basym bóligin avtomattandyrýǵa, konkýrstyq rásimderdiń merzimin qysqartýǵa, adamı faktordyń yqpalyn azaıtýǵa jáne qabyldanatyn kadrlyq sheshimderdiń ashyqtyǵy men aıqyndyǵyn arttyrýǵa múmkindik beredi, — dedi ol Ortalyq kommýnıkatsııalar qyzmetindegi brıfıngte.
Keńes múshesi elimizde kásibı sýdıalar korpýsyn qalyptastyrýdyń jańa sapaly modeli jasaqtalǵanyn atap ótti.
— Eń bastysy, bul ózgerister naqty nátıje berip otyr. Kadr tapshylyǵy azaıyp keledi. Konkýrstyq rásimder jedeldedi. Biliktilik emtıhany jańǵyrtyldy. Kadrlyq rezerv nyǵaıdy. Sýdıalardy irikteý júıesiniń ashyqtyǵy men oǵan degen senim arta tústi. Biraq biz úshin eń mańyzdy kórsetkish taǵaıyndalǵan sýdıalardyń sany emes. Bizdiń maqsatymyz — sapa. Basty nátıje — sot júıesine kásibı biligi joǵary, táýelsiz, ádil ári qoǵam senimine ıe sýdıalardyń kelýi. Óıtkeni ádil sot — quqyq ústemdiginiń de, azamattardyń memleketke degen seniminiń de basty kepili, — dedi Janat Ospanova.
Buǵan deıin elimizde sýdıalardy irikteý tolyqqandy baldyq baǵalaý júıesine kóshetinin jazǵan edik.
