Sýdıalardy irikteý júıesi ózgermek
ASTANA. KAZINFORM — Sýdıalardy irikteý tolyqqandy baldyq baǵalaý júıesine kóshedi. Bul týraly Joǵary sot keńesiniń múshesi Janat Ospanova aıtty.
— Joǵary sot keńesi sýdıalardy irikteý júıesin odan ári jetildirý jumystaryn jalǵastyryp keledi. Qazirgi ýaqytta basty nazar kandıdattardy baǵalaý ólshemderin jetildirýge aýdarylǵan. Negizgi maqsat — baǵalaý júıesin burynǵydan da obektıvti, ashyq ári ólshenetin etý. Osyǵan baılanysty konkýrstyń qoldanystaǵy úsh kezeńdi modeli saqtala otyryp, tolyqqandy baldyq baǵalaý júıesine kóshý josparlanǵan. Bul nátıjelerdi avtomatty túrde esepteýge, sýbektıvti faktordyń yqpalyn barynsha azaıtýǵa jáne konkýrstyq rásimderdi odan ári tsıfrlandyrýǵa múmkindik beredi, — dedi ol Ortalyq kommýnıkatsııalar qyzmetindegi brıfıngte.
Onyń aıtýynsha, baǵalaý kezinde sot tóreligin júzege asyrý sapasyna, kásibı bedelge, bilim berý jáne ǵylymı jetistikterge, joǵary júkteme jaǵdaıyndaǵy jumys tájirıbesine, memlekettik tildi meńgerý deńgeıine jáne kandıdattyń sot júıesin damytýǵa qosqan úlesine basymdyq beriledi.
— Bul jumysta sottarmen ózara is-qımyl jónindegi keńesterdiń róli erekshe. Osy oraıda bir mańyzdy máselege nazar aýdarǵym keledi. Sýdıalardy irikteý protsesi qoǵamnan oqshaý júrgizilmeıdi. Sottarmen ózara is-qımyl jónindegi keńester arqyly zań qoǵamdastyǵynyń, buqaralyq aqparat quraldarynyń jáne jurtshylyqtyń ókilderi kandıdattardyń moraldyq-adamgershilik qasıetterin baǵalaýǵa qatysady. Demek, bul ınstıtýt sýdıalar korpýsyn qalyptastyrýǵa qoǵamnyń naqty qatysýyn qamtamasyz etetin mańyzdy tetik. Sondyqtan búgingi mindet — keńesterdiń ókilettikterin keńeıtý emes, olardyń qyzmetin burynǵydan da ashyq, túsinikti jáne obektıvti etý, — dedi Joǵary sot keńesiniń múshesi.
Janat Ospanova osy maqsatta kandıdattar týraly málimetterdi jınaý men tekserýdiń biryńǵaı tártibin belgileý, biryńǵaı baǵalaý ólshemderin engizý, qorytyndylardyń birizdendirilgen nysanyn bekitý, kandıdattardyń protsestik quqyqtaryn naqtylaý jáne rásimderdiń ashyqtyǵyn kúsheıtý kózdelip otyrǵanyn aıtady. Bul ózgerister Joǵary sot keńesine kadrlyq sheshimderdi neǵurlym dáleldi ári obektıvti qorytyndylar negizinde qabyldaýǵa múmkindik bermek.
Buǵan deıin Konstıtýtsııadaǵy jańa ózgerister ádil sot tóreligin nyǵaıtatynyn jazǵan edik.
