Sýdıalardy irikteý emtıhanynyń merzimi qysqardy

ASTANA. KAZINFORM – Qazaqstanda sýdıalardy irikteý emtıhany jetildirilip, ony tapsyrý merzimi edáýir qysqardy. Bul týraly Ortalyq kommýnıkatsııalar qyzmetinde Joǵary Sot Keńesiniń múshesi Janat Ospanova málimdedi.

2024 jylmen salystyrǵanda emtıhan sany úsh esege ósip, 12 emtıhan ótkizildi. Oǵan 1 365 adam qatysty. Sonymen qatar biliktilik komıssııasynyń quramy 40%-ǵa deıin jańartyldy.

– Buryn komıssııa otyrystary aıyna bir ret ótse, qazir tórt retke deıin kóbeıdi. Sonyń nátıjesinde emtıhan tapsyrý merzimi 1,5 jyldan 3 aıǵa deıin qysqardy, - dedi Janat Ospanova.

Emtıhan mazmuny da jańartyldy.

– Buryn 300 suraq bolsa, qazir 1000 jańa suraq ázirlendi. Alaıda qoljetimdilik artqanyna qaramastan, talaptar tómendegen joq. Nátıjesinde qatysýshylardyń tek 24,5%-y ǵana emtıhandy sátti tapsyrdy, - dedi ol.

Aıta keteıik, buǵan deıin 2025 jylǵy 1 shildeden bastap Astanada kassatsııalyq sottar jumysyn bastaǵany habarlanǵan bolatyn.