Sýdıaǵa qurmetsizdik tanytqan elorda turǵyny bes táýlikke qamaldy

ASTANA. KAZINFORM — Sot otyrysyna qatysýy kerektigi týraly habarlama alǵan elorda turǵyny sýdıaǵa qatysty qurmetsizdik tanytqan aýdıo habarlama jibergen.

Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty sýdıaǵa qurmet kórsetpedi degen aıyppen L. esimdi azamatqa qatysty isti qarady.

Astana qalasynyń mamandandyrylǵan aýdanaralyq ákimshilik soty Joǵarǵy sottyń uıǵarymy boıynsha sot baqylaýy sheńberinde L-ǵa sot otyrysyna kelý týraly habarlama joldaǵan. Habarlamany alǵannan keıin L. sot ákimshisi basshysynyń mindetin atqarýshy men sot otyrysy hatshysynyń WhatsApp jelisine sot pen sýdıaǵa qurmetsizdik tanytqan aýdıo habarlamalar jibergen. Artynan atalǵan fakti boıynsha ákimshilik quqyq buzýshylyqqa qatysty is qozǵaldy.

— Sotta L. óziniń jeke pikir bildirgenin túsindirip, kinásin moıyndamady. Quqyq buzýdyń mán-jaıy ákimshilik quqyq buzýshylyq týraly hattamamen, sarapshynyń qorytyndysymen, aýdıojazbalarmen, stenogrammamen jáne kýálerdiń aıǵaqtarymen sol sııaqty istiń basqa da materıaldarymen rastaldy, — delingen habarlamada.

Sot barysynda jazany jeńildetetin jáne aýyrlatatyn mán-jaı anyqtalǵan joq.

Elorda soty habarlaǵandaı, atalǵan jaǵdaıda Ákimshilik quqyq buzýshylyq kodekstiń 653-baby 1-bóligine sáıkes eskertý, 20 AEK mólsherinde aıyppul nemese 5 táýlikke qamaýǵa alý jazasy kózdeledi.

— Sot Ákimshilik quqyq buzýshylyq kodekstiń 653-babynyń 1-bóligi boıynsha L-ny kináli dep tanyp, oǵan 5 táýlik merzimge ákimshilik qamaqqa alý túrindegi jazany taǵaıyndady, — delingen sottyń sheshiminde.

Qaýly zańdy kúshine engen joq.

Eske sala ketsek, Astanadaǵy «Elorda Qurylys Kompanııasy» bóliminiń basshysy 10 jylǵa sottaldy.