Sýdıa Sultan Sarsemalıevke nege osyndaı jaza berilgenin túsindirdi
ATYRAÝ. KAZINFORM — Atyraýda tórt adamdy óltirdi dep aıyptalǵan Sultan Sarsemalıevke qatysty sot úkimi jarııalanǵannan keıin qylmystyq ister jónindegi mamandandyrylǵan aýdanaralyq sottyń sýdıasy Zarema Hamıdýllına ómir boıyna bas bostandyǵynan aıyrý jazasynyń taǵaıyndalý sebepterin túsindirdi.
Sýdıanyń aıtýynsha, sot aıyptalýshynyń tergeý kezinde oqıǵa bolǵan jerdegi aıǵaqtardy naqtylaý barysynda aıtqan sózderine de quqyqtyq baǵa bergen.
— Tergeý barysynda oqıǵa ornynda kórsetilgen beınejazbada sottalýshy «bul is-áreketti jasaǵannan keıin ádet bolyp qalady eken» degen. Bul onyń adam ómirin qııýdy qalypty qubylys retinde qabyldaı bastaǵanyn kórsetedi. Sondyqtan sot ony qoǵamǵa erekshe qaýipti adam dep tanydy, — dedi Zarema Hamıdýllına.
Sot úkimine sáıkes, Sultan Sarsemalıevtiń 2025 jylǵy 14 mamyrdan bastap jyl sońyna deıin tórt adamdy qasaqana óltirgeni, alaıaqtyq jasaǵany, urlyqqa barǵany, jábirlenýshilerdiń jeke kýálikterin zańsyz ıemdengeni, olardyń múlkin talan-tarajǵa salǵany jáne bank qosymshalaryn paıdalanyp, nesıe rásimdegeni tolyq dáleldengen.
Sýdıa qorǵaý tarapynyń aıyptalýshy ózin qorǵaý kezinde Naýryz Muqanǵalıevti óltirdi, qylmys jasaǵan sátte affekt jaǵdaıynda boldy degen ýájderin negizsiz dep tanydy.
— Qorǵaný barysynda adamǵa birneshe márte, naqty aıtqanda on ret pyshaq jaraqatyn salý múmkin emes. Budan bólek, máıitti ádeıi jasyryp kómýi onyń qylmysty qasaqana jasaǵanyn dáleldeıdi. Sarapshynyń qorytyndysyna sáıkes, máıit 10 aıdan keıin tabylǵandyqtan deneniń kóp bóligi shirip ketken. Soǵan qaramastan saqtalǵan teri bólikterinen keminde on pyshaq jaraqaty anyqtalǵan. Teriniń kóp bóligi bolmaǵandyqtan, jaraqat sany budan da kóp bolýy múmkin, — dedi sýdıa.
Sot barysynda barlyq tórt jábirlenýshiniń keýde tusyna, ıaǵnı júrek aımaǵyna pyshaq jaraqaty salynǵany anyqtalǵan. Bul da qylmystyń kezdeısoq emes, qasaqana jasalǵanyn kórsetken. Sondaı-aq sot qylmystyń kek alý maqsatynda jasalǵan degen qorytyndyǵa kelgen.
— Alǵashqy sot otyrysynda Sultan Sarsemalıevtiń ózi «olardyń maǵan jasaǵan qastandyqtaryna men qasaqana qastandyqpen jaýap berýdi sheshtim, aldyn ala josparladym» dep málimdegen bolatyn. Oǵan árbir aıtqan sózi sotta dálel retinde paıdalanylýy múmkin ekeni eskertildi. Sot talqylaýy barysynda ol qaıyn jurtyn kinálaýǵa tyrysqanymen, otbasyndaǵy qarym-qatynastyń buzylýyna óziniń kináli ekeni anyqtaldy. Sonymen qatar, onyń jubaıyna opasyzdyq jasaǵany azamattyq is boıynsha buryn qabyldanǵan sot sheshimimen dáleldendi, — dedi Zarema Hamıdýllına.
Sýdıanyń aıtýynsha, sot protsesi kezinde aıyptalýshydan mundaı qylmysqa ıtermelegen naqty qandaı sózder nemese áreketter bolǵany birneshe ret suralǵan. Alaıda ol bul suraqtarǵa naqty jaýap bere almaǵan. Úkimdi túsindirý barysynda sýdıa qylmystyń saldarynan kámeletke tolmaǵan balalardyń taǵdyryna da toqtaldy.
— Qazir kishkentaı balalar balalar úıinde. Olarǵa tátti de, oıynshyq ta emes, eń aldymen ata-ananyń meıirimi men mahabbaty qajet. Ókinishke qaraı, sizdiń áreketińizdiń saldarynan olar osynyń bárinen aıyrylyp otyr. Bul olardyń ómirine óshpes iz qaldyrdy, — dep oıyn aıtty Zarema Hamıdýllına.
Sýdıa sottalýshynyń anasynyń «ulym bul ómirde eshqandaı qyzyq kórgen joq» degen sózin de nazardan tys qaldyrmaǵanyn aıtty.
— Al Naýryz Muqanǵalıev pen Meıramgúl Qarabalına ómirden qandaı qyzyq kórdi? Ekeýi de ómir boıy múgedektikpen ómir súrdi. Ǵumyrlary asa qatygezdikpen qıyldy. Artynda urpaq ta qalmady, — dedi ol.
Marqumdardyń týysy Ádemi Shylmaǵambetova sot úkiminen keıin berilgen jazamen kelisetinin, balalardyń ázirge memlekettik mekemede bolǵanyn qup kóretinin aıtty.
— Áýeli olardyń anasy tolyq em qabyldap, saýyǵyp shyqsyn. Sodan keıin balalaryn óz qamqorlyǵyna alady dep oılaımyz. Zań boıynsha da balalardyń anasyna berilýi tıis. 2022 jyly erli-zaıyptylar ajyrasqanda balalar anasynyń qaraýyna qalǵan bolatyn. Qazir olardyń memleket qamqorlyǵynda bolǵanyn qalaımyz. Anasy emdelip shyqqannan keıin balalaryn ózi baýyryna basady dep senemiz, — dedi jábirlenýshi taraptyń ókili Ádemi Shylmaǵambetova.
Búgin qoǵamdy dúr silkindirgen qandy qylmysqa núkte qoıyldy. Sultan Sarsemalıevtiń kinási tolyq dáleldenip, ol ómir boıyna sottaldy.
Aıyptalýshynyń sottaǵy kúlkisi jaza taǵaıyndaý kezinde eskerilgenin eske salaıyq.
