Sýdy tıimsiz paıdalaný jáne ekologııalyq zardaptardy elemeý problemalarymen betpe-bet keldik - Prezıdent

Sý saıasatyn qalyptastyrý kezinde onyń shekteýli tabıǵı resýrs ekeni eskerilýi tıis. Bul týraly Prezıdent Qasym-Jomart Toqaev Araldy qutqarý qorynyń quryltaıshy memleketteri basshylary keńesi otyrysynda aıtty, dep habarlaıdy QazAqparat Aqordaǵa silteme jasap.

«Biz sýdy tıimsiz paıdalaný jáne ekologııalyq zardaptardy elemeý problemalarymen betpe-bet kelip otyrmyz. Bizdiń óńirdegi Syrdarııa men Amýdarııa sekildi eki negizgi ózen sýlary arnasynyń rettelý dárejesi tym joǵary. Bul ózenderdiń basseınderinde jalpy kólemi shamamen 65 tekshe kılometrge jetetin 80-nen astam sý qoımasy salynǵan. Osylaısha, antropogendik júkteme artyp, tabıǵatty ekstensıvti paıdalaný jalǵasady jáne ártúrli áleýmettik-ekologııalyq problemalar ýshyǵady degen boljam bar. Munyń bári aımaqtyq qaýipsizdikke aıtarlyqtaı qater tóndiredi.Qazaq halqynda «Sý – yrystyń kózi» degen maqal bar. Memleketterimiz sý saıasatyn qalyptastyrý kezinde sýdyń shekteýli tabıǵı resýrs ekenin eskerýge tıis dep sanaımyn. Sebebi, búkil aımaqtyń ál-aýqaty men turaqty damýy sýǵa tikeleı baılanysty», - dedi Prezıdent.

Sondaı-aq, sýdy únemdeý máselesinde tsıfrlyq tehnologııalardy engizýdiń ózektiligine toqtaldy.

«Tsıfrlyq tehnologııalardy engizý arqyly sýdy barynsha únemdeý máselesi óte ózekti. Bul bizdiń sý resýrstary jónindegi yntymaqtastyǵymyzdyń negizgi baǵyty bola alady. Jýyrdaǵy Joldaýymda men sý máselesine erekshe nazar aýdardym. Meniń tapsyrmam boıynsha Qazaqstanda osy salanyń ózekti máselelerimen tikeleı aınalysatyn jeke vedomstvo – Sý resýrstary jáne ırrıgatsııa mınıstrligi quryldy. Barlyq kórshiles memlekettermen konstrýktıvti qarym-qatynas jasaımyz dep senemin», - dedi Q. Toqaev.

Aıta keteıik, Qasym-Jomart Toqaev Tájikstan Respýblıkasynda jumys saparymen júr.