Sýdy tıimdi paıdalanýda jańa tehnologııalardy engizý kerek – Asqar Mamın

NUR-SULTAN. QazAqparat – Búgin Úkimet otyrysynda Premer-Mınıstr Asqar Mamın kanaldar men sý qoımalaryn salý jáne rekonstrýktsııalaý týraly aıtyp berdi, dep habarlaıdy QazAqparat tilshisi.

«Memleket basshysy Qasym-Jomart Kemeluly Toqaev sýarmaly jerlerdiń aýdanyn 2025 jylǵa qaraı 2,2 mln gektarǵa deıin, al 2030 jylǵa qaraı 3 mln gektarǵa deıin keńeıtý boıynsha naqty mindetti aıqyndady. Búginde halyq pen ekonomıka salalary úshin sý alýdyń jalpy kólemi shamamen 25 tekshe kılometrdi quraıdy. Jyl ótken saıyn qajettilikter arta beretin bolady jáne bul - sýdy tıimdi paıdalanýdy, eń jańa tehnologııalardy engizýdi, salany tsıfrlandyrýdy talap etedi. Tek avtomattandyrylǵan bólý men tasymaldaý esebinen sýdyń artyq jumsalýy jyl saıyn 1,2 tekshe shaqyrymǵa qysqarady», - dedi A. Mamın.

Osy rette, aldaǵy bes jyldyq kezeńde 120 kanaldy rekonstrýktsııalaý men jańa 9 iri sý qoımasyn salý jóninde sharalar qabyldanady.

«Sonymen qatar, óńirlik deńgeıde jaıylymdyq jerlerdegi gıdrotehnıkalyq qurylystardy, qudyqtardy jańǵyrtýdy, jóndeýdi jáne olarǵa qyzmet kórsetýdi júrgizý qajet. Jalpy, sý qoımalaryn salý jáne jumys istep turǵandaryn jańǵyrtý, sondaı-aq sý únemdeý tehnologııalaryn qoldaný – jyl saıyn 6,4 tekshe shaqyrym kóleminde qosymsha sý resýrstaryn jınaýdy qamtamasyz etedi. Bul sharalar «Jasyl Qazaqstan» ulttyq jobasynda da bar. Qabyldanyp jatqan sharalardy qoldaýdy usynamyn», - dedi Premer-Mınıstr.

Aıta keteıik, qazirgi kezde 600 myń gektar sýarmaly jerdi qalpyna keltirýdi qamtamasyz etý úshin kanaldardy rekonstrýktsııalaý jáne sý qoımalardy salý boıynsha jumystar júrgizilip jatyr.