Sýdy kommertsııalyq esepteý qurylǵylaryn ornatýdy mindetteý týraly usynys jasaldy
ASTANA. QazAqparat - Búgin Ulttyq ekonomıka mınıstrligi Parlament Májilisinde «Qazaqstan Respýblıkasynyń keıbir zańnamalyq aktilerine sýmen jabdyqtaý jáne sý burý máseleleri boıynsha ózgerister men tolyqtyrýlar engizý týraly» zań jobasyn tanystyrdy.
QR Ulttyq ekonomıka vıtse-mınıstri Qaıyrbek Óskenbaevtyń aıtýynsha, zań jobasynda elimizdiń Sý, Jer jáne Ekologııalyq kodeksterine, «Memlekettik múlik týraly», «Energııa únemdeý jáne energııa tıimdiligin arttyrý týraly» zańdaryna ózgerister men tolyqtyrýlar engizý kózdelgen.
Atap aıtqanda, Sý kodeksinde sýmen jabdyqtaý jáne sý burý salasynda tutynýshylardyń quqyqtary men mindetteri aıqyndalady.
«Jer kodeksine jer ýchaskesin tańdaý aktisin rásimdegen kezde qoldanystaǵy ınjenerlik kommýnıkatsııalardy bólinetin ýchaske shekarasynyń syrtyna shyǵarý qajettiligi týraly norma engiziledi. Kúndelikti paıdalaný barysynda, ásirese apattardy joıý qajet bolǵan jaǵdaıda sýmen jabdyqtaý jáne sý burý jelilerine erkin qol jetkizý talap etiledi. Tehnıkanyń júrýi, tıisti jumys túrlerin júrgizý múmkindigi qamtamasyz etilýge tıis»,-dedi vıtse-mınıstr.
Al Ekologııalyq kodekske toqtalatyn bolsaq, qazirgi ýaqytta toǵan-jınaǵyshtar, toǵan-býlandyrǵyshtar, bıologııalyq toǵandar, súzgileý alańdary qandaı qurylystarǵa jatqyzylatyndyǵy jóninde bir maǵynaly túsinik joq. «Engizilip otyrǵan tolyqtyrý osy nysandardy sarqyndy sýlardy bıologııalyq tazartý qurylystaryna jatqyzýǵa múmkindik beredi», - deıdi Q. Óskenbaev.
Sonymen qatar, energııa men sýdy únemdeý, aýyz sýdy tıimdi paıdalaný talaptaryn negizge ala otyryp, «Energııa únemdeý jáne energııa tıimdiligin arttyrý týraly» QR Zańynyń normalarynda sýdy kommertsııalyq esepteý qurylǵylaryn ornatýdy mindetteý týraly usynys jasaldy.
